വിജയുടെ അവസാന സിനിമ രാഷ്ട്രീയ നോവലിനെ ആസ്പദമാക്കി, സംവിധാനം ചെയ്യുക വെട്രിമാരൻ തന്നെയെന്ന് സൂചന

അടുത്തിടെയാണ് രാഷ്ട്രീയത്തിലേക്കുള്ള തന്റെ ചുവടുമാറ്റം നടന്‍ വിജയ് ഔദ്യോഗികമായി പ്രഖ്യാപിച്ചത്. ഇതിന്റെ ഭാഗമായി നിലവില്‍ ഉറപ്പ് നല്‍കിയ സിനിമകള്‍ക്ക് ശേഷം പൂര്‍ണ്ണമായി രാഷ്ട്രീയത്തില്‍ ശ്രദ്ധ നല്‍കുമെന്നാണ് വിജയ് പ്രഖ്യാപനം നടത്തിയത്. നിലവില്‍ വെങ്കട് പ്രഭുവിനൊപ്പം ചെയ്യുന്ന സിനിമയ്ക്ക് ശേഷം മറ്റ് സിനിമകളൊന്നും തന്നെ താരം പ്രഖ്യാപിച്ചിട്ടില്ല. വിജയുടെ അവസാന സിനിമ വെട്രിമാരനാകും സംവിധാനം ചെയ്യുക എന്ന റിപ്പോര്‍ട്ടുകളാണ് തമിഴകത്ത് നിന്ന് ഇപ്പോള്‍ വരുന്നത്.

ചിത്രത്തിന്റെ കഥ വെട്രിമാരന്‍ നേരത്തെ തന്നെ വിജയോട് പറഞ്ഞിരുന്നതായാണ് റിപ്പോര്‍ട്ടുകള്‍. റിപ്പോര്‍ട്ടുകള്‍ പ്രകാരം കോട്ട നീലിമയുടെ ഷൂസ് ഓഫ് ഡെഡ് എന്ന രാഷ്ട്രീയ നോവലിനെ അടിസ്ഥാനപ്പെടുത്തിയാകും പുതിയ സിനിമ. കര്‍ഷക ആത്മഹത്യകളും അതിനെ ചുറ്റിപറ്റിയുള്ള ശക്തമായ രാഷ്ട്രീയവുമാണ് നോവലിന്റെ വിഷയം. രാഷ്ട്രീയത്തിലിറങ്ങുന്നതിന് മുന്നോടിയായി ചെയ്യാവുന്ന ഏറ്റവും മികച്ച ചിത്രം ഇതായിരിക്കുമെന്ന അഭിപ്രായമാണ് വിജയ് ആരാധകര്‍ക്കുമുള്ളത്.