Samvrutha Sunil: നന്ദനത്തിലെ ബാലാമണിയാകാൻ സ്‌ക്രീൻ ടെസ്റ്റ് ചെയ്തിരുന്നുവെന്ന് സംവൃത സുനിൽ

ബിജു മേനോന്റെ നായികയായി 'സത്യം പറഞ്ഞാൽ വിശാസിക്കുമോ' എന്ന ചിത്രത്തിലൂടെ തിരിച്ചുവരവ് നടത്തി.

ലാൽ ജോസിന്റെ രസികനിലൂടെ വെള്ളിത്തിരയിലെത്തിയ നടിയാണ് സംവൃത സുനിൽ. പിന്നീട് നിരവധി സിനിമകളിൽ സംവൃത അഭിനയിച്ചിട്ടുണ്ട്. അയാളും ഞാനും തമ്മിൽ എന്ന ചിത്രത്തിന് ശേഷം നടി വിവാഹം കഴിച്ച് സിനിമയിൽ നിന്നും ഇടവേള എടുത്തു. പിന്നീട് വർഷങ്ങൾക്ക് ശേഷം ബിജു മേനോന്റെ നായികയായി 'സത്യം പറഞ്ഞാൽ വിശാസിക്കുമോ' എന്ന ചിത്രത്തിലൂടെ തിരിച്ചുവരവ് നടത്തി. 

സംവൃത സുനിൽ അഭിനയിച്ച സിനിമകളിൽ ഒന്നാണ് ചന്ദ്രോത്സവം. ചിത്രത്തിലെ സംവൃതയുടെ കഥാപാത്രം ഏറെ ശ്രദ്ധിക്കപ്പെട്ടിരുന്നു. ചന്ദ്രോത്സവത്തിലേക്ക് താൻ വന്നത് എങ്ങനെയാണെന്ന് പറയുകയാണ് നടി ഇപ്പോൾ. ദി ക്യൂ സ്റ്റുഡിയോയ്ക്ക് നൽകിയ അഭിമുഖത്തിൽ സംസാരിക്കുകയായിരുന്നു താരം. രഞ്ജിത്തിന്റെ നന്ദനത്തിലേക്ക് തന്നെ പരിഗണിച്ചിരുന്നതായി സംവൃത പറയുന്നുണ്ട്. ഈ സിനിമയിലെ ബാലാമണിയ്ക്ക് വേണ്ടി സ്‌ക്രീൻ ടെസ്റ്റ് നടത്തിയിരുന്നുവെന്നും ആ പരിചയമാണ് തന്നെ ചന്ദ്രോത്സവത്തിലേക്ക് വിളിക്കാൻ കാരണമായതെന്നും സംവൃത പറയുന്നു.

'ചന്ദ്രോത്സവം എന്ന സിനിമയിലേക്ക് ഞാൻ എത്തുന്നത് രഞ്ജിത്ത് അങ്കിൾ വഴിയാണ്. അദ്ദേഹത്തിന്റെ നന്ദനം എന്ന സിനിമ കാരണമാണ് എനിക്ക് ഈ സിനിമ മേഖലയുമായി ബന്ധം ഉണ്ടാകുന്നത്. അതിലെ ബാലാമണിക്ക് വേണ്ടി സ്‌ക്രീൻ ടെസ്റ്റ് നൽകിയിരുന്നു ഞാൻ. അന്ന് അത് നടന്നില്ല. എങ്കിലും അദ്ദേഹത്തിന്റെ ഒരു സിനിമയിൽ ഭാവിയിൽ അഭിനയിക്കാൻ കഴിയുമെന്ന ഒരു വിശ്വാസം എനിക്കുണ്ടായി. രസികൻ കഴിഞ്ഞാണ് ചന്ദ്രോത്സവം ചെയ്യുന്നത്. ചെറിയ വേഷമായിരുന്നു. മീനയുടെ കുട്ടിക്കാലം, ലാലേട്ടനൊപ്പം ഒരു സിനിമ, ഇതൊന്നും ഞാൻ ഒരിക്കലും വിചാരിക്കുന്നില്ല', സംവൃത പറയുന്നു.