ജെഎൻയു സന്ദർശനത്തെ തുടർന്ന് ഐഎം‌ഡി‌ബിയിൽ ഛപാക് സിനിമയുടെ റേറ്റിങ്ങ് റിപ്പോർട്ട് ചെയ്‌ത് കുറച്ച സംഭവത്തിൽ പ്രതികരണവുമായി നടി ദീപിക പദുക്കോൺ. ഐഎം‌ഡി‌ബി റേറ്റിങ് മാറ്റാൻ നിങ്ങൾക്ക് സാധിച്ചേക്കാം എന്നാൽ എന്റെ മനസ്സ് മാറ്റാൻ നിങ്ങൾക്കാകില്ലെന്ന് ദീപിക വ്യക്തമാക്കി. ഒരു അഭിമുഖത്തിനിടെയായിരുന്നു ദീപികയുടെ പ്രതികരണം.
ജെഎൻയുവില്‍ വിദ്യാര്‍ഥികള്‍ ആക്രമിക്കപ്പെട്ട സംഭവത്തിന് പിന്നാലെ ദീപിക ക്യാമ്പസിൽ സന്ദർശനം നടത്തിയിരുന്നു. ഛപാക് സിനിമയുടെ രണ്ട് ദിവസം മുൻപായിരുന്നു ഇത്. ഇതോടെ ഛപാക്കിന്റെ പ്രമോഷന് വേണ്ടിയാണ് ദീപിക ജെഎന്‍യുവിലെത്തിയതെന്ന് ബിജെപി, സംഘപരിവാര്‍ നേതാക്കള്‍ ആരോപിച്ചിരുന്നു. ഇതിനെ തുടർന്ന് കടുത്ത സൈബർ ആക്രമണമാണ് ദീപികയ്‌ക്കും സിനിമക്കുമെതിരെ നടന്നത്.
