ഉണ്ണി മുകുന്ദന്‍ പഞ്ചപാവം, സൈജു കുറുപ്പ് അങ്ങനെയല്ല !

കഴിഞ്ഞ ദിവസം പുറത്തുവന്ന മേപ്പടിയാൻ ഫസ്റ്റ് ലുക്ക് പോസ്റ്റർ സോഷ്യൽ മീഡിയയിൽ ശ്രദ്ധേയമാകുകയാണ്. മോഹൻലാൽ, ദുൽഖർ സൽമാൻ, പൃഥ്വിരാജ് എന്നിവർ ചേർന്നാണ് ഫസ്റ്റ് ലുക്ക് റിലീസ് ചെയ്തത്. അതേസമയം പോസ്റ്ററിൽ ചില രസകരമായ കണ്ടെത്തലുമായി ആരാധകരും എത്തിയിരിക്കുകയാണ്.

ഗ്രാമീണ പശ്ചാത്തലത്തിൽ ഒരുങ്ങുന്ന ഈ ചിത്രത്തിൽ തനി നാട്ടിൻപുറത്തുകാരനായാണ് ഉണ്ണി മുകുന്ദൻ എത്തുന്നത്. ജയകൃഷ്ണൻ എന്നാണ് അദ്ദേഹത്തിൻറെ കഥാപാത്രത്തിൻറെ പേര്. ഉണ്ണിമുകുന്ദൻ, സൈജു കുറുപ്പ്, കോട്ടയം രമേശ് എന്നിവരടങ്ങുന്ന പോസ്റ്റർ ആണ് പുറത്തുവന്നത്. ഈ ചിത്രത്തിലെ മൂന്ന് കഥാപാത്രങ്ങളും മൂന്നു തരത്തിലുള്ള ചായകൾ ആണ് കുടിക്കുന്നത്. 

പാൽ ചായ കുടിക്കുന്ന ഉണ്ണിമുകുന്ദനും കട്ടൻ ചായ കുടിക്കുന്ന സൈജു കുറുപ്പും നല്ല സ്ട്രോങ്ങ് ചായ കുടിക്കുന്ന കോട്ടയം രമേശിനെയുമാണ് പോസ്റ്ററിൽ കാണുന്നത്. ഇത് സിനിമയിലെ കഥാപാത്രങ്ങളുടെ സ്വഭാവത്തെ സൂചിപ്പിക്കുന്നു എന്നാണ് ആരാധകർ പറയുന്നത്. പാൽ ചായ കുടിക്കുന്ന ഉണ്ണിമുകുന്ദൻ നിഷ്കളങ്കനായ ഒരു കഥാപാത്രത്തെ ആയിരിക്കും അവതരിപ്പിക്കുക എന്നും അവർ പറയുന്നു. എന്തായാലും ഈ സിനിമയുടെ പുതിയ വിവരങ്ങൾക്കായി കാത്തിരിക്കാം.