ലോകേഷ് കനകരാജ് സംവിധാനം ചെയ്യുന്ന മാസ്റ്ററിന്റെ ഓഡിയോ ലോഞ്ചിനിടെ തല അജിതിനെ കുറിച്ച് ദളപതി വിജയ് പറഞ്ഞ വാക്കുകൾ ഏറ്റെടുത്ത് ആരാധകർ. അജിതിനോടുള്ള സ്നേഹം തുറന്നു പറയുകയാണ് ദളപതി. ഓഡിയോ ലോഞ്ചിനിടെ ചിത്രത്തിലെ ഗാനത്തിന് ചുവടുകള്‍ വച്ചതിന് ശേഷം സംസാരിക്കുകയായിരുന്നു വിജയ്.
പതിവിനു വിപരീതമായി കറുപ്പ് നിറത്തിലുള്ള കോട്ട് ധരിച്ചാണ് പരിപാടിക്ക് എത്തിയത്. വസ്ത്രധാരണത്തിലൂടെ താൻ അജിത്തിനെ അനുകരിക്കുകയായിരുന്നുവെന്ന് വിജയ് തന്നെ വ്യക്തമാക്കി. തന്റെ കോസ്റ്റ്യൂം ഡിസൈനർ ഇത്തവണ കോട്ട് ഇടാൻ ആവശ്യപ്പെടുകയായിരുന്നുവെന്നും ഇട്ടുനോക്കാമെന്ന് കരുതിയെന്നും അദ്ദേഹം പറഞ്ഞു.
”എന്റെ സുഹൃത്ത് അജിത്തിനെ എനിക്ക് വളരെ ഇഷ്ടമാണ്. അദ്ദേഹത്തെ പോലെയാണ് ഞാന്‍ ഇന്ന് വസ്ത്രം ധരിച്ചിരിക്കുന്നത്” എന്ന് വിജയ് പറഞ്ഞു. അജിത്ത് ‘ബില്ല’ എന്ന സിനിമയില്‍ ധരിച്ച സമാനമായ വസ്ത്രമാണ് വിജയ് ധരിച്ചിരിക്കുന്നത്.