രാജമൗലി- മഹേഷ് ബാബു സിനിമ ഇന്ത്യ ഇതുവരെ കാണാത്ത തരത്തിൽ ബ്രഹ്മാണ്ഡമായ സിനിമയെന്ന് വിജയേന്ദ്രപ്രസാദ്

ബാഹുബലി എന്ന ഒരൊറ്റ സിനിമയിലൂടെ ഇന്ത്യയിലെ തന്നെ ഏറ്റവും വിപണിമൂല്യമുള്ള സംവിധായകനായി മാറിയ ആളാണ് എസ് എസ് രാജമൗലി. ബാഹുബലിയ്ക്ക് ശേഷം ആര്‍ആര്‍ആറിലൂടെയും മികച്ച വിജയം സമ്മാനിക്കാന്‍ രാജമൗലിയ്ക്ക് സാധിച്ചു. ഈഗ, മഗധീര,ബാഹുബലി എന്ന് തുടങ്ങി രാജമൗലിയുടെ പ്രധാന ഹിറ്റ് ചിത്രങ്ങള്‍ക്കെല്ലാം കഥയൊരുക്കിയത് രാജമൗലിയുടെ പിതാവായ വിജയേന്ദ്ര പ്രസാദാണ്. നിലവില്‍ വിജയേന്ദ്ര പ്രസാദിന്റെ കഥയില്‍ തെലുങ്ക് സൂപ്പര്‍ താരം മഹേഷ് ബാബുവിനെ വെച്ചാണ് രാജമൗലി പുതിയ സിനിമയൊരുക്കുന്നത്.

ഇപ്പോഴിതാ ഇന്ത്യന്‍ സിനിമ ഇന്ന് വരെ കണ്ടതിലും വലിയ സംഭവമാണ് അണിയറയില്‍ ഒരുങ്ങുന്നതെന്ന് വ്യക്തമാക്കിയിരിക്കുകയാണ് സിനിമയുടെ തിരക്കഥാകൃത്തുകൂടിയായ വിജയേന്ദ്ര പ്രസാദ്. ചിത്രത്തിന്റെ സ്‌ക്രിപ്റ്റ് പൂര്‍ത്തിയായി കഴിഞ്ഞു. ഇന്ത്യാനാ ജോണ്‍സ് സീരീസിനെ ഓര്‍മിപ്പിക്കുന്ന തരത്തില്‍ ആഫ്രിക്കന്‍ കാടുകളിലൂടെയുള്ള സാഹസികമായ യാത്രയായിരിക്കും സിനിമ. ഇന്ത്യന്‍സിനിമ ഇന്ന് വരെ കാണാത്ത തരത്തിലുള്ള സാഹസിക രംഗങ്ങള്‍ ചിത്രത്തിലുണ്ടാകും. മഹേഷ് ബാബുവിനൊപ്പം ചെയ്യുന്ന സിനിമ ഇന്ത്യയ്ക്ക് പുറത്തും വലിയ രീതിയില്‍ മാര്‍ക്കറ്റ് ചെയ്യപ്പെടും. വിജയേന്ദ്രപ്രസാദ് വ്യക്തമാക്കി.