10300 കോടിയുടെ സ്വത്ത്, തേനീച്ചയെ വിഴുങ്ങി മരണം; ആരാണ് കരിഷ്മയുടെ മുന്‍ഭര്‍ത്താവ് സഞ്ജയ് കപൂര്‍?

പോളോ കളിക്കുന്നതിനിടെ അബദ്ധത്തില്‍ അദ്ദേഹം തേനീച്ചയെ വിഴുങ്ങുകയും ഈച്ച തൊണ്ടയില്‍ കുത്തിയതോടെ ശ്വാസ തടസമുണ്ടാവുകയുമായിരുന്നു

ബോളിവുഡിലെ ഞെട്ടിച്ച് നടി കരിഷ്മ കപൂറിന്റെ മുന്‍ഭര്‍ത്താവ് സഞ്ജയ് കപൂറിന്റെ മരണം. പോളോ കളിക്കുന്നതിനിടെ ഹൃദയാഘാതത്തെ തുടര്‍ന്നാണ് അദ്ദേഹം മരണപ്പെടുന്നത്. വ്യാഴാഴ്ച ഇംഗ്ലണ്ടില്‍ വച്ചായിരുന്നു മരണം. മരണകാരണം തേനീച്ചയാണ്. പോളോ കളിക്കുന്നതിനിടെ അബദ്ധത്തില്‍ അദ്ദേഹം തേനീച്ചയെ വിഴുങ്ങുകയും ഈച്ച തൊണ്ടയില്‍ കുത്തിയതോടെ ശ്വാസ തടസമുണ്ടാവുകയുമായിരുന്നു. 53 വയസായിരുന്നു. 

2003ലായിരുന്നു ബോളിവുഡ് നടി കരിഷ്മ കപൂറിനെ സഞ്ജയ് വിവാഹം ചെയ്തത്. ഇവര്‍ക്ക് സമൈറ, കിയാന്‍ എന്നിങ്ങനെ 2 മക്കളുണ്ട്. 2016ലാണ് ഇരുവരും വിവാഹമോചിതരായത്. പ്രിയ സച്ച്‌ദേവാണ് ഇപ്പോഴത്തെ ഭാര്യ. ഈ ബന്ധത്തില്‍ ഒരു കുട്ടിയുണ്ട്. ബിസിനസ് ഭീമനായ സഞ്ജയ് കപൂര്‍ മൊബിലിറ്റി ടെക്‌നോളജി കമ്പനിയായ സോന കോംസ്റ്റാറിന്റെ ചെയര്‍മാനാണ്. രാജ്യത്തിന് അകത്തും പുറത്തും പടര്‍ന്നു കിടക്കുന്നതാണ് സോന കോംസ്റ്റാറിന്റെ സാമ്രാജ്യം.

ബോളിവുഡിനെ ഞെട്ടിച്ചുകൊണ്ടായിരുന്നു കരിഷ്മയും സഞ്ജയും ഡിവോഴ്സ് പ്രഖ്യാപനം നടത്തിയത്. സഞ്ജയ്‌ക്കെതിരെ ഗുരുതര ആരോപണങ്ങളാണ് അന്ന് കോടതിയില്‍ കരിഷ്മ ഉന്നയിച്ചത്. വിവാഹ ബന്ധം പിരിഞ്ഞുവെങ്കിലും മക്കളായ സമൈറയുടേയും കിയാന്റേയും ജീവിതത്തിന്റെ ഭാഗമായി തന്നെ തുടര്‍ന്നിരുന്നു സഞ്ജയ്. ഫോബ്‌സിന്റെ റിപ്പോര്‍ട്ട് പ്രകാരം സഞ്ജയ് കപൂറിന്റെ ആസ്തി 10300 കോടി രൂപയാണ്. ലോകത്തിലെ ഏറ്റവും സമ്പന്നരുടെ പട്ടികയിലും സ്ഥാനം നേടിയിട്ടുള്ള വ്യക്തിയാണ് സഞ്ജയ് കപൂര്‍. 

കഴിഞ്ഞ കുറച്ച് കാലമായി വ്യക്തി ജീവിതത്തിന് കൂടുതൽ പ്രാധാന്യം നൽകിയിരുന്നു അദ്ദേഹം. ഇതിന്റെ ഭാഗമായി കരിഷ്മ കപൂറുമായുള്ള പ്രശ്‌നങ്ങള്‍ പറഞ്ഞ് അവസാനിപ്പിച്ചിരുന്നു. ഈയ്യടുത്ത് ഇരുവരും ഒരുമിച്ച് ഡിന്നര്‍ കഴിക്കാനെത്തുന്ന വീഡിയോ വൈറലായിരുന്നു. കൂടുതല്‍ മെച്ചപ്പെട്ട മാതാപിതാക്കളാകാന്‍ താനും ഭാര്യയും ലൈഫ് കോച്ചിനെ നിയമിച്ചതായും ഈയ്യടുത്ത് സഞ്ജയ് പറഞ്ഞിരുന്നു.