ഇത് കത്തും! കാർത്തിയും സൂര്യയും ഒന്നിക്കുന്നു, നായിക അനുഷ്ക ഷെട്ടി

കൈതിയുടെ രണ്ടാം ഭാഗം പ്രഖ്യാപിച്ചെങ്കിലും കൂടുതൽ വിവരങ്ങളൊന്നും പുറത്തുവന്നിരുന്നില്ല.

തമിഴ് സിനിമാപ്രേമികളെ പോലെ തന്നെ മലയാളികളും ഏറെ ആവേശത്തോടെ കാത്തിരിക്കുന്ന സിനിമയാണ് കൈതി 2. ലോകേഷ് കനകരാജിന്റെ ഏറ്റവും മികച്ച സിനിമയാണ് കൈതി. കൈതിയുടെ രണ്ടാം ഭാഗം പ്രഖ്യാപിച്ചെങ്കിലും കൂടുതൽ വിവരങ്ങളൊന്നും പുറത്തുവന്നിരുന്നില്ല. കൈതി 2 വിൽ നായകനായ കാർത്തിക്ക് ഒപ്പം എൽസിയുവിലെ മറ്റുതാരങ്ങളും എത്തുമോയെന്നാണ് ആരാധകർ ഉറ്റുനോക്കുന്നത്. ഇപ്പോഴിതാ ചിത്രത്തിന്റെ അപ്ഡേറ്റ് ആണ് സോഷ്യൽ മീഡിയയിലെ ചർച്ചാവിഷയം.

കാർത്തി അവതരിപ്പിക്കുന്ന ദില്ലിയും സൂര്യയുടെ റോളക്‌സ്‌ എന്ന കഥാപാത്രവും കൈതി 2 വിൽ നേർക്കുനേർ വരുമെന്നാണ് പുതിയ റിപ്പോർട്ട്. ചിത്രത്തിൽ കമൽ ഹാസൻ കാമിയോ റോളിൽ വരുമെന്നും റിപ്പോർട്ടുണ്ട്. ചിത്രത്തിൽ ഒരു പ്രധാന കഥാപാത്രമായി അനുഷ്ക ഷെട്ടി എത്തുമെന്നും തമിഴ് ട്രാക്കർമാർ എക്സിൽ കുറിക്കുന്നുണ്ട്. അങ്ങനെയെങ്കിൽ അലക്സ് പാണ്ട്യൻ എന്ന സിനിമയ്ക്ക് ശേഷം കാർത്തിയും അനുഷ്‌കയും ഒന്നിക്കുന്ന സിനിമയാകും ഇത്.

'കൈതി 2 ന്റെ വർക്കുകൾ ഒരു മാസം മുന്നേ ആരംഭിച്ചു. ഈ വർഷം അവസാനത്തോടെ ചിത്രീകരണം തുടങ്ങും,' എന്നാണ് സിനിമയുടെ നിർമാതാവ് എസ് ആർ പ്രഭു മാധ്യമങ്ങളോട് പ്രതികരിച്ചിരിക്കുന്നത്. കഴിഞ്ഞ വർഷം 'മെയ്യഴകൻ' സിനിമയുടെ റിലീസിനോട് അനുബന്ധിച്ച് നടത്തിയ ചടങ്ങിലാണ് കൈതി 2 ഒരുങ്ങുന്നതായി കാർത്തി പ്രഖ്യാപിച്ചത്. പിന്നാലെ സിനിമയിൽ സൂര്യയുടെ റോളക്സ് എന്ന കഥാപാത്രം ഉണ്ടാകുമെന്ന തരത്തിൽ അഭ്യൂഹങ്ങളും സമൂഹ മാധ്യമങ്ങളിൽ സജീവമാണ്. ഇതും ഈ ചിത്രത്തിന് മേൽ ഹൈപ്പ് കൂട്ടുന്ന കാരണങ്ങളിൽ ഒന്നാണ്.