ക്രിസ്റ്റഫര്‍ നോളന്‍ സിനിമയായ ഇന്‍സെപ്ഷനിലെ വേഷം നിരസിച്ചതിനെ പറ്റി വിശദമാക്കി ഹോളിവുഡ് താരം വില്‍ സ്മിത്ത്. സിനിമയുടെ ഇതിവൃത്തം എന്താണെന്ന് മനസിലാക്കാന്‍ പറ്റാതെ വന്നതിനെ തുടര്‍ന്നാണ് സിനിമ നിരസിച്ചതെന്നാണ് ഒരു അഭിമുഖത്തില്‍ താരം വെളിപ്പെടുത്തിയത്. ലോക സിനിമാപ്രേമികള്‍ക്കിടയില്‍ ചര്‍ച്ചയായ സിനിമയില്‍ വില്‍ സ്മിത്ത് നിരസിച്ച വേഷം പിന്നീട് ചെയ്തത് ലിയോനാഡോ ഡികാപ്രിയോ ആയിരുന്നു.
199ല്‍ പുറത്തിറങ്ങിയ ദി മെട്രിക്‌സ് എന്ന സിനിമയിലെയും വേഷം താന്‍ ഇങ്ങനെ വേണ്ടെന്ന് വെച്ചിരുന്നെന്നും അഭിമുഖത്തില്‍ താരം പറഞ്ഞു. ഇതാദ്യമായാണ് ഇന്‍സെപ്ഷനിലെ വേഷം വേണ്ടെന്ന് വെച്ചതിനെ പറ്റി തുറന്ന് പറയുന്നതെന്നും സിനിമ പറയുന്ന അള്‍ട്ടര്‍നേറ്റീവ് റിയാലിറ്റി എന്ന ആശയം തനിക്ക് മനസിലായില്ലെന്നും ഇപ്പോള്‍ ആലോചിക്കുമ്പോള്‍ ആ സിനിമ നഷ്ടമായതില്‍ വിഷമമുണ്ടെന്നും വില്‍സ്മിത്ത് പറഞ്ഞു.
സിനിമയില്‍ ഡികാപ്രിയോ അവതരിപ്പിച്ച ഡോം കോംബ് എന്ന വേഷത്തിനായി ആദ്യം പരിഗണിച്ചത് ബ്രാഡ് പീറ്റിനെയായിരുന്നു. എന്നാല്‍ ബ്രാഡ് പീറ്റും നിരസിച്ചതോടെയാണ് ആ വേഷം ഡികാപ്രിയോയിലേക്കെത്തിയത്.
