Publish Date: Wed, 16 Jun 2021 (08:30 IST)
Updated Date: Wed, 16 Jun 2021 (08:32 IST)
തിരുവനന്തപുരം: സംസ്ഥാനത്ത് ലോക് ഡൗണ് നിയന്ത്രണങ്ങളില് ഇളവ് വന്നെങ്കിലും എല്ലാവരും കോവിഡിനെ ഫലപ്രദമായി പ്രതിരോധിക്കാന് ജാഗ്രത തുടരണമെന്ന് ആരോഗ്യ വകുപ്പ് മന്ത്രി വീണാ ജോര്ജ്. കോവിഡിന്റെ രണ്ടാം തരംഗത്തില് നിന്നും നാം പൂര്ണ മുക്തരല്ല. കേരളത്തിന്റെ പല ജില്ലകളിലും ഡെല്റ്റാ വൈറസിന്റ വ്യാപനം നടക്കുന്നുണ്ട്. ഇക്കാരണം കൊണ്ട് പെട്ടന്ന് രോഗവ്യാപനം ഉണ്ടാകാന് സാധ്യതയുണ്ട്. മാത്രമല്ല മൂന്നാം തരംഗം ഉണ്ടായേക്കാമെന്ന വിദഗ്ധാഭിപ്രായവുമുണ്ട്.
അതിനാല് നമ്മള് പാലിച്ച ജാഗ്രതയും കരുതലും കുറേ നാളുകള് കൂടി തുടരേണ്ടതുണ്ട്. നിയന്ത്രണങ്ങളില് ഇളവ് വന്നെങ്കിലും നമ്മള് സ്വയം നിയന്ത്രിക്കണം. പനി, ചുമ, തൊണ്ടവേദന തുടങ്ങിയ രോഗലക്ഷണങ്ങള് ഉള്ളവരും രോഗിയുമായി നേരിട്ട് സമ്പര്ക്കത്തിലുള്ളവരും ഒരു കാരണവശാലും പുറത്തിറങ്ങരുത്. രോഗലക്ഷണമുള്ളവര് നേരിട്ടോ ഇ സഞ്ജീനി വഴിയോ ചികിത്സ തേടേണ്ടതാണ്. മാത്രമല്ല ഇവര് കോവിഡ് പരിശോധന നടത്തേണ്ടതുമാണ്. പൊതു സ്ഥലത്തേക്കിറങ്ങുന്ന എല്ലാവരും ഡബിള് മാസ്ക്, അല്ലെങ്കില് എന് 95 മാസ്ക് ധരിക്കേണ്ടതാണ്. ക്വാറന്റൈനിലും ഐസൊലേഷനിലും ഉള്ളവര് അത് കൃത്യമായി പാലിക്കണമെന്നും മന്ത്രി വ്യക്തമാക്കി.
