ഇന്ത്യക്കെതിരായ പെര്‍ത്ത് ക്രിക്കറ്റ് ടെസ്റ്റിന്റെ രണ്ടാം ദിനത്തില്‍ ഇന്ത്യന്‍ പേസര്‍ ഹര്‍ഷിത് റാണയ്ക്ക് മുന്നറിയിപ്പ് നല്‍കി ഓസീസ് താരം മിച്ചല്‍ സ്റ്റാര്‍ക്ക്. മത്സരത്തിന്റെ രണ്ടാം ദിനത്തില്‍ തന്റെ ആദ്യ പന്തില്‍ തന്നെ ഓസീസ് പ്രതീക്ഷയായ അലക്സ് ക്യാരിയെ ജസ്പ്രീത് ബുമ്ര പുറത്താക്കിയിരുന്നു. ഇതോടെ ഓസീസ് സ്‌കോര്‍ 100 കടക്കില്ലെന്ന് പ്രതീക്ഷിച്ചെങ്കിലും നഥാന്‍ ലിയോണിനെയും ജോഷ് ഹേസല്‍വുഡിനെയും കൂട്ട് പിടിച്ച് മിച്ചല്‍ സ്റ്റാര്‍ക്ക് ഓസീസ് സ്‌കോര്‍ 100 കടത്തുകയായിരുന്നു.
മത്സരത്തിനിടെ തുടരെ ബൗണ്‍സറുകളെറിഞ്ഞും തുടര്‍ച്ചായി ബീറ്റണാക്കിയും സ്റ്റാര്‍ക്കിനെ ഇന്ത്യന്‍ പേസറായ ഹര്‍ഷിത് റാണ വിറപ്പിച്ചിരുന്നു. ഇതിനിടെയാണ് ബൗള്‍ ചെയ്ത ശേഷം തിരിഞ്ഞുനടക്കുകയായിരുന്നു ഹര്‍ഷിതിനെ നോക്കി മിച്ചല്‍ സ്റ്റാര്‍ക്ക് മുന്നറിയിപ്പ് നല്‍കിയത്. കൊല്‍ക്കത്ത നൈറ്റ് റൈഡേഴ്‌സില്‍ സഹതാരങ്ങളായിരുന്നു ഇരു താരങ്ങളും അതിനാല്‍ തന്നെ ഹര്‍ഷിതിനെ നോക്കി ചെറുചിരിയോടെയായിരുന്നു സ്റ്റാര്‍ക്കിന്റെ മുന്നറിയിപ്പ്. നിന്നെക്കാള്‍ വേഗത്തില്‍ പന്തെറിയാന്‍ എനിക്കറിയാം. നിനക്കത് ഓര്‍മയുണ്ടാവുമല്ലോ എന്നായിരുന്നു സ്റ്റാര്‍ക്ക് പറഞ്ഞത്. ഒരു ചിരിയോടെയാണ് ഹര്‍ഷിത് ഇതിനെ സ്വീകരിച്ചതെങ്കിലും മത്സരത്തില്‍ സ്റ്റാര്‍ക്കിന്റെ വിക്കറ്റ് വീഴ്ത്തിയത് ഹര്‍ഷിത് തന്നെയായിരുന്നു. തന്റെ അരങ്ങേറ്റ ടെസ്റ്റില്‍ 3 വിക്കറ്റുകളാണ് ഹര്‍ഷിത് റാണ സ്വന്തമാക്കിയത്. 112 പന്തില്‍ നിന്നും 26 റണ്‍സാണ് സ്റ്റാര്‍ക്ക് സ്വന്തമാക്കിയത്.
