ഐസിസി ടെസ്റ്റ് റാങ്കിംഗില്‍ ഇന്ത്യന്‍ നായകന്‍ വിരാട് കോലിയുടെ തൊട്ടടുത്തെത്തി ഇന്ത്യയുടെ സ്റ്റാര്‍ ഓപ്പണര്‍ രോഹിത് ശര്‍മ. ഒരുകാലത്ത് ടെസ്റ്റ് ക്രിക്കറ്റിനു പറ്റിയ ബാറ്റ്‌സ്മാന്‍ അല്ലെന്ന് വിമര്‍ശനം നേരിട്ട രോഹിത് അതിശയിപ്പിക്കുന്ന മുന്നേറ്റമാണ് ഈയടുത്ത് നടത്തിയത്.
ഏറ്റവും ഒടുവില്‍ പുറത്തുവന്ന ടെസ്റ്റ് റാങ്കിംഗ് പ്രകാരം വിരാട് കോലിക്ക് തൊട്ടു പിന്നിലാണ് രോഹിത് ശര്‍മയുടെ സ്ഥാനം. റാങ്കിംഗില്‍ കോലി അഞ്ചാം സ്ഥാനത്തും രോഹിത് ശര്‍മ ആറാം സ്ഥാനത്തുമാണ്. എന്നാല്‍, ഇരുവരും തമ്മില്‍ വെറും മൂന്ന് പോയിന്റ് വ്യത്യാസമാണുള്ളത്. കോലിക്കു 776 റേറ്റിങ് പോയിന്റ് ആണുള്ളത്. എന്നാല്‍, രോഹിത് ശര്‍മയ്ക്ക് 773 പോയിന്റുണ്ട്. ഇംഗ്ലണ്ടിനെതിരായ മൂന്നാം ടെസ്റ്റില്‍ മികച്ച പ്രകടനം നടത്തിയാല്‍ കോലിയെ മറികടക്കാന്‍ രോഹിത് ശര്‍മയ്ക്ക് സാധിക്കും.
