രവി ശാസ്ത്രി ഇന്ത്യന്‍ ക്രിക്കറ്റ് ടീം പരിശീലക സ്ഥാനം ഒഴിയുമ്പോള്‍ ആരാകും പകരക്കാരന്‍ ? ഇന്ത്യന്‍ ക്രിക്കറ്റ് ടീം മുന്‍ താരം രാഹുല്‍ ദ്രാവിഡിന്റെ പേരാണ് ആദ്യംമുതല്‍ ഉയര്‍ന്നുകേട്ടിരുന്നത്. എന്നാല്‍, പരിശീലക സ്ഥാനത്തേക്ക് രാഹുല്‍ ദ്രാവിഡ് എത്തില്ല. ടീം പരിശീലകനാകാന്‍ തനിക്ക് താല്‍പര്യമില്ലെന്ന് രാഹുല്‍ ദ്രാവിഡ് ബിസിസിഐയെ അറിയിച്ചതായാണ് വിവരം.
ദേശീയ ക്രിക്കറ്റ് അക്കാദമി ചെയര്‍മാന്‍ സ്ഥാനത്തേക്ക് രാഹുല്‍ ദ്രാവിഡ് വീണ്ടും അപേക്ഷ നല്‍കിയിട്ടുണ്ട്. ബെംഗളൂരുവില്‍ തന്നെ തുടരാനാണ് താരം ആഗ്രഹിക്കുന്നത്. അതുകൊണ്ട് ദേശീയ ടീം പരിശീലക സ്ഥാനം ഏറ്റെടുക്കില്ലെന്ന് ഏറെക്കുറെ ഉറപ്പായി കഴിഞ്ഞു. ദേശീയ അക്കാദമി ചെയര്‍മാന്‍ സ്ഥാനത്ത് തുടരാനാണ് തനിക്ക് താല്‍പര്യമെന്നും അതുകൊണ്ട് പരിശീലക സ്ഥാനം ഏറ്റെടുക്കുന്നില്ലെന്നും രാഹുല്‍ ദ്രാവിഡ് അറിയിച്ചതായി ബിസിസിഐയോട് അടുത്ത വൃത്തങ്ങളും വ്യക്തമാക്കി.
ടി 20 ലോകകപ്പിന് ശേഷമാണ് രവി ശാസ്ത്രി പരിശീലക സ്ഥാനം ഒഴിയുക.
