സൂര്യകുമാർ പാകിസ്ഥാനിലായിരുന്നെങ്കിൽ, സൽമാൻ ബട്ട് പറയുന്നു

ശ്രീലങ്കക്കെതിരായ ടി20 പരമ്പരയിലെ തകർപ്പൻ പ്രകടനത്തിന് പിന്നാലെ വലിയ രീതിയിലുള്ള പ്രശംസയാണ് ഇന്ത്യൻ താരം സൂര്യകുമാറിന് ലഭിക്കുന്നത്. നിലവിലെ താരങ്ങളും മുൻ താരങ്ങളുമെല്ലാം സൂര്യയെ പുകഴ്ത്തുന്ന തിരക്കിലാണ്. ഇതിനിടയിൽ ശ്രദ്ധേയമായ ഒരു വിലയിരുത്തലുമായി എത്തിയിരിക്കുകയാണ് പാക് താരമായ സൽമാൻ ബട്ട്.

സൂര്യകുമാർ 30 കഴിഞ്ഞാണ് ഇന്ത്യൻ ടീമിലെത്തിയതെന്ന് ഞാൻ വായിച്ചിട്ടുണ്ട്. പാകിസ്ഥാനിലായിരുന്നെങ്കിൽ 30 വയസ്സെന്ന പ്രായപരിധിയുടെ ഇരയായി സൂര്യ മാറുമായിരുന്നു. പാക് ക്രിക്കറ്റ് ബോർഡ് മുൻ ചെയർമാൻ റമീസ് രാജ് 30 കടന്നവരെ ദേശീയ ടീമിലേക്ക് പരിഗണിക്കില്ലെന്ന് റിപ്പോർട്ടുകളുണ്ടായിരുന്നു. ഈ പശ്ചാത്തലത്തിലാണ് ബട്ടിൻ്റെ തുറന്ന് പറച്ചിൽ.

31ആം വയസിൽ ഇന്ത്യൻ ടീമിലെത്തിയ സൂര്യയ്ക്ക് അരങ്ങേറ്റ വർഷത്തിൽ കാര്യമായ സ്വാധീനം സൃഷ്ടിക്കാനായില്ലെങ്കിലും കഴിഞ്ഞ വർഷം ടി20 ക്രിക്കറ്റിൽ ആയിരത്തിലേറെ റൺസ് കണ്ടെത്തി ടോപ് സ്കോറർ ആയിരുന്നു. കഴിഞ്ഞ വർഷത്തെ അതേ ഫോം ഇക്കുറിയും തുടരുമെന്ന സൂചനയാണ് ശ്രീലങ്കക്കെതിരായ മത്സരത്തിലൂടെ താരം തന്നിരിക്കുന്നത്.