പെര്‍ത്തില്‍ ഇന്ത്യന്‍ ബാറ്റ്‌സ്‌മാന്മാര്‍ വിറയ്‌ക്കും; സ്‌റ്റാര്‍ക്കിന് സഹായവുമായി സൂപ്പര്‍ താരം രംഗത്ത്

അഡ്‌ലെയ്ഡ് ടെസ്‌റ്റില്‍ മോശം പ്രകടനം പുറത്തെടുത്ത ഓസ്‌ട്രേലിയന്‍ പേസ് ബോളര്‍ മിച്ചല്‍ സ്‌റ്റാര്‍ക്കിനെതിരെ വ്യാപക പ്രതിഷേധമാണ് ഉയര്‍ന്നത്. തോല്‍‌വിക്ക് കാരണം സ്‌റ്റാര്‍ക്കിന്റെ മങ്ങിയ ഫോമും എക്‍സ്‌ട്രാ റണ്ണുകളുമാണെന്ന് സ്‌പിന്‍ ഇതിഹാസം ഷെയ്‌ന്‍ വോണ്‍ വരെ തുറന്നടിച്ചിരുന്നു.

വിമര്‍ശനങ്ങള്‍ ശക്തമായതോടെ സ്‌റ്റാര്‍ക്കിന് പിന്തുണയുമായി മുന്‍താരം മിച്ചല്‍ ജോണ്‍സണ്‍ രംഗത്തുവന്നു. സ്‌റ്റാര്‍ക്കിനെ എന്തോ പ്രശ്‌നം അലട്ടുന്നുണ്ടെന്നും അദ്ദേഹത്തിന്റെ പഴയ ഫോം വീണ്ടെടുക്കാന്‍ താന്‍ സഹായം വാഗ്ദാനം ചെയ്‌തതായും ജോണ്‍സണ്‍ വ്യക്തമാക്കി.

കൂടെ കളിച്ച നിലയില്‍ സ്‌റ്റാര്‍ക്കിനെ അടുത്തറിയാം. പെര്‍ത്തിലെ മത്സരത്തിനു മുമ്പ് ഒരുമിച്ചിരുന്ന് സംസാരിച്ചാല്‍ സമ്മര്‍ദ്ദം ഒഴിവാക്കാന്‍ കഴിഞ്ഞേക്കും. സഹായം വാഗ്ദാനം ചെയ്‌ത് ഓസീസ് പേസര്‍ക്ക് സന്ദേശം അയച്ചെന്നും ജോണ്‍സണ്‍ പറഞ്ഞു.

പരുക്കിനു ശേഷം തിരിച്ചെത്തിയ സ്‌റ്റാര്‍ക്കിന്റെ പന്തുകള്‍ക്ക് പഴയ സ്വിംഗില്ല. തനിക്കറിയാവുന്ന സ്‌റ്റാര്‍ക്കിന്റെ പ്രകടനം ഇങ്ങനെയല്ല. പെര്‍ത്തിലെ പിച്ച് പേസ് ബോളര്‍മാര്‍ക്ക് അകമഴിഞ്ഞ് സഹായം നല്‍കുമെന്നും ജോണ്‍സണ്‍ കൂട്ടിച്ചേര്‍ത്തു.