'ബ്രേക്ക്ഫാസ്റ്റ് റൂമിലെത്തിക്കാന്‍ ബുദ്ധിമുട്ടുണ്ട്, വേണമെങ്കില്‍ റസ്റ്റോറന്റില്‍ പോയി കഴിക്കൂ'; ഇന്ത്യന്‍ താരങ്ങളുടെ വാട്‌സ്ആപ് ഗ്രൂപ്പിലേക്ക് മെസേജ്

മാഞ്ചസ്റ്റര്‍ ടെസ്റ്റ് ഉപേക്ഷിച്ചതിനു പിന്നാലെ ഇന്ത്യന്‍ താരങ്ങളുടെ വാട്‌സ്ആപ് ഗ്രൂപ്പിലേക്ക് വന്ന സന്ദേശങ്ങള്‍ ചര്‍ച്ചയാകുന്നു. ഇഎസ്പിഎന്‍ ക്രിക് ഇന്‍ഫോയാണ് ഈ വിവരം പങ്കുവച്ചിരിക്കുന്നത്. മത്സരം ഉപേക്ഷിച്ചതായും താരങ്ങള്‍ ഹോട്ടല്‍ റൂമില്‍ തന്നെ തങ്ങണമെന്നും ആണ് ആദ്യം എത്തിയ മെസേജ്. ഹോട്ടല്‍ അധികൃതരില്‍ നിന്നാണ് ഈ മെസേജ് ഇന്ത്യന്‍ താരങ്ങളുടെ വാട്‌സ്ആപ് ഗ്രൂപ്പിലേക്ക് എത്തിയത്. 

'മത്സരം ഉപേക്ഷിച്ചു. ഹോട്ടല്‍ മുറിയില്‍ നിങ്ങളുടെ സുരക്ഷിതമായ താമസം ഉറപ്പ് വരുത്തേണ്ടത് വളരെ പ്രധാനപ്പെട്ട കാര്യമാണ്. റൂമില്‍ തുടരൂ,' എന്നാണ് ഇന്ത്യന്‍ താരങ്ങളുടെ വാട്‌സ്ആപ് ഗ്രൂപ്പിലേക്ക് വന്ന ആദ്യ മെസേജ്. 

ഈ മെസേജ് വന്ന് പത്ത് മിനിറ്റ് കഴിഞ്ഞപ്പോള്‍ അടുത്ത മെസേജും എത്തി. 'നിങ്ങള്‍ താമസിക്കുന്ന മുറിയിലേക്ക് ബ്രേക്ക്ഫാസ്റ്റ് എത്തിക്കാന്‍ ഞങ്ങള്‍ക്ക് ബുദ്ധിമുട്ടുണ്ട്. ഭക്ഷണം കഴിക്കാന്‍ താല്‍പര്യമുള്ളവര്‍ മുറിയില്‍ നിന്ന് പുറത്തിറങ്ങി റസ്റ്റോറന്റില്‍ പോയി കഴിക്കണമെന്ന് ആവശ്യപ്പെടുന്നു,' എന്നതായിരുന്നു രണ്ടാമത്തെ മെസേജ്.