ഇന്ത്യൻ ക്രിക്കറ്റിലെ തന്നെ ശാന്തനായ കളിക്കാരനാണ് ആശിഷ് നെഹ്‌റ. എതിരാളികളോട് പോലും മാന്യമായി മാത്രം പെരുമാറാറുള്ള നെഹ്‌റയുടെ ദേഷ്യം പക്ഷേ എന്താണെന്ന് അറിയാവുന്നത് മുൻ നായകൻ എം എസ് ധോണിക്കായിരിക്കും. ഒരിക്കൽ നെഹ്‌റയുടെ നാവിന്റെ ചൂട് ശരിക്ക് അറിന്നിട്ടുണ്ട് മുൻ ഇന്ത്യൻ നായകൻ. ഇപ്പോളിതാ ആ സംഭവം ഓർത്തെടുത്തിരിക്കുകയാണ് ആശിഷ് നെഹ്‌റ.
15 വര്‍ഷം മുമ്പ് 2005ല്‍ അഹമ്മദാബാദില്‍ നടന്ന ഇന്ത്യ-പാക്കിസ്ഥാന്‍ ഏകദിന പരമ്പരയിലെ നാലാം മത്സരത്തിലായിരുന്നു സംഭവം. നെഹ്റയെറിഞ്ഞ പന്ത് അഫ്രീദിയുടെ ബാറ്റില്‍ തട്ടിയശേഷം ധോണിക്കും ഫസ്റ്റ് സ്ലിപ്പില്‍ നിന്നിരുന്ന ദ്രാവിഡിനും ഇടയിലൂടെ ബൗണ്ടറിയിലേക്ക് പോയി. ഇതിന് പിന്നാലെയാണ് നെഹ്‌റ ധോണിയോട് പരസ്യമായി ചൂടായത്. എന്നാൽ അന്നത്തെ ഈ സംഭവം ഓർക്കുമ്പോൾ തനിക്ക് തന്നെ നാണക്കേട് തോന്നുന്നുവെന്നാണ് നെഹ്‌റ പറയുന്നത്.
അന്നത്തെ എന്റെ പെരുമാറ്റമോര്‍ത്ത് എനിക്ക് ഇപ്പോള്‍ ഒട്ടും അഭിമാനമില്ല.അഫ്രീദി അതിന് തൊട്ടു മുമ്പുള്ള എന്റെ പന്ത് സിക്സറിന് പറത്തിയിരുന്നു.കൂടാതെ ഇന്ത്യ- പാകിസ്ഥാൻ മത്സരവും സ്വാഭാവികമായും ഞാൻ സമ്മർദ്ദത്തിലായി. ഈ സാഹചര്യത്തിൽ ഒരവസരം നഷ്ടപ്പെടുത്തിയപ്പോൾ എനിക്ക് നിയന്ത്രണം വിട്ടു നെഹ്‌റ പറഞ്ഞു.
