ലെജന്‍ഡ് ലീഗില്‍ ഗുജറാത്ത് ഗ്രേറ്റ്‌സിനായി തകര്‍പ്പന്‍ പ്രകടനം കാഴ്ചവെച്ച് മലയാളി താരം എസ് ശ്രീശാന്ത്. ഇന്ത്യ ക്യാപ്പിറ്റല്‍സിനെതിരായ മത്സരത്തില്‍ 3 ഓവറില്‍ 16 റണ്‍സ് മാത്രം വഴങ്ങിയ ശ്രീശാന്ത് ഒരു മെയ്ഡന്‍ ഓവര്‍ അടക്കം തകര്‍പ്പന്‍ പ്രകടനമാണ് നടത്തിയത്. മത്സരത്തിലെ ഈ മെയ്ഡന്‍ ഓവറാണ് ഇപ്പോള്‍ സോഷ്യല്‍ മീഡിയയില്‍ ഇപ്പോള്‍ ചര്‍ച്ചയായിരിക്കുന്നത്.
ഇയാന്‍ ബെല്‍ നയിച്ച ഇന്ത്യ ക്യാപ്പിറ്റല്‍സിനെതിരെ ഗുജറാത്തിനായി ആദ്യ ഓവര്‍ എറിയാനെത്തിയ ശ്രീശാന്ത് പ്രതീക്ഷയ്ക്കപ്പുറമുള്ള പ്രകടനമാണ് നടത്തിയത്. മുന്‍ വിക്കറ്റ് കീപ്പര്‍ നമാന്‍ ഓജയും ഡ്വെയ്ന്‍ സ്മിത്തുമായിരുന്നു ഇന്ത്യ ക്യാപ്പിറ്റല്‍സിനായി ഓപ്പണിംഗില്‍ ഇറങ്ങിയത്. നമാന്‍ ഓജയായിരുന്നു ശ്രീശാന്തിനെ നേരിട്ടത്. എന്നാല്‍ സ്‌ട്രൈക്ക് റൊട്ടേറ്റ് ചെയ്യാന്‍ പോലും ചെയ്യാന്‍ സാധിക്കാത്ത വിധത്തില്‍ ഓജയെ ശ്രീശാന്ത് പൂട്ടുകയായിരുന്നു. ഈ പ്രകടനമാണ് സോഷ്യല്‍ മീഡിയ ഏറ്റെടുത്തത്. വാതുവെയ്പ് വിവാദങ്ങളില്‍ പെട്ടില്ലായിരുന്നുവെങ്കില്‍ ഇന്ത്യയ്ക്ക് മികച്ച ഒരു ബൗളറെ ശ്രീശാന്തിലൂടെ ലഭിച്ചേനെയെന്നാണ് പലരും ശ്രീശാന്തിന്റെ പ്രകടനങ്ങളെ പറ്റി പ്രതികരിക്കുന്നത്.
