ചരിത്രം തിരുത്തിയെഴുതി കോഹ്ലി; പഴങ്കഥയായത് ഗവാസ്‌ക്കറിന്റേയും പോണ്ടിംഗിന്റേയും റെക്കോര്‍ഡ് !
റെക്കോര്‍ഡുകള്‍ അതിര്‍ത്തി കടത്തി കോഹ്ലി
റെക്കോര്‍ഡുകളില്‍ നിന്നും റെക്കോര്‍ഡുകളിലേക്ക് കുതിച്ച് ഇന്ത്യന്‍ നായകന്‍ വിരാട് കോഹ്ലി. ശ്രീലങ്കയ്ക്കെതിരായ രണ്ടാം ക്രിക്കറ്റ് ടെസ്റ്റിൽ സെഞ്ചുറി നേടിയതോടെയാണ് ടെസ്റ്റുകളിൽ ഏറ്റവും കൂടുതൽ സെഞ്ചുറി നേടിയ ഇന്ത്യൻ നായകനെന്ന റെക്കോർഡ് കോഹ്ലി സ്വന്തം പേരിലാക്കിയത്.
സുനില്‍ ഗാവസ്കറിന്റെ 11 സെഞ്ചുറികളുടെ റെക്കോർഡാണ് 12 സെഞ്ചുറികളുമായി കോഹ്ലി മറികടന്നത്. ഒരു കലണ്ടർ വർഷം ഏറ്റവും കൂടുതൽ അന്താരാഷ്ട്ര സെഞ്ചുറികൾ നേടുന്ന നായകനെന്ന അപൂർവ്വ റെക്കോര്‍ഡും കോഹ്ലി സ്വന്തമാക്കി. ഈ വർഷത്തെ പത്താമത് സെഞ്ചുറിയാണ് കോഹ്ലി നാഗ്പൂരിൽ സ്വന്തമാക്കിയത്.
മുന്‍ ഓസീസ് നായകൻ റിക്കി പോണ്ടിംഗിന്റെ ഒമ്പത് സെഞ്ചുറികളുടെ റെക്കോർഡാണ് കോഹ്ലി സ്വന്തം പേരിലെഴുതിയത്. ഈ വർഷം ആറ് ഏകദിന സെഞ്ചുറികളും നാല് ടെസ്റ്റ് സെഞ്ചുറികളുമാണ് ഇതുവരെ കോഹ്ലി നേടിയത്. കരിയറിലെ 51-ാം സെഞ്ചുറിയാണ് കോഹ്ലി നാഗ്പൂരിൽ കുറിച്ചത്. ലങ്കയ്ക്കെതിരായ ആദ്യ ടെസ്റ്റിലും കോഹ്ലി സെഞ്ചുറി നേടിയിരുന്നു.
