Cricket Worldcup 2023: ഞങ്ങൾ ദൃഡനിശ്ചയത്തോടെ പോരാടും, നല്ല വാർത്തകൾക്ക് കാത്തിരിക്കു: ലോകകപ്പിന് മുൻപെ വിരാട് കോലി

സ്വന്തം മണ്ണില്‍ നടക്കാനിരിക്കുന്ന ഏകദിന ലോകകപ്പില്‍ ഉജ്ജ്വല പ്രകടനം പുറത്തെടുക്കാന്‍ പരമാവധി ശ്രമിക്കുമെന്ന് ഇന്ത്യന്‍ സൂപ്പര്‍ താരം വിരാട് കോലി. ആരാധകര്‍ക്ക് ഏറ്റവും മികച്ച നിമിഷങ്ങള്‍ സമ്മാനിക്കാന്‍ താന്‍ അടക്കമുള്ള ഇന്ത്യന്‍ ടീം ഒന്നടങ്കം ദൃഡനിശ്ചയം എടുത്തുകഴിഞ്ഞതായും കോലി വ്യക്തമാക്കി.

ആരാധകരുടെ മികച്ച പിന്തുണയുടെ ബലത്തില്‍ ലോകകിരീടം നമ്മള്‍ നേടുമെന്ന് മനസില്‍ ദൃഡമായി ഉറപ്പിച്ചിരിക്കുകയാണ്. കഴിഞ്ഞ ലോകകപ്പ് വിജയങ്ങളുടെ ഓര്‍മകള്‍ നമുക്കുണ്ട്. പ്രത്യേകിച്ച് 2011ലെ ഐതിഹാസികമായ ലോകകപ്പ് വിജയം. അതെല്ലാം ആരാധകരുടെ ഹൃദയങ്ങളില്‍ പതിഞ്ഞിരിക്കുന്ന കാര്യമാണ്. അത്തരം ഓര്‍മകള്‍ ആരാധകര്‍ക്കായി ഒരുക്കാനാണ് ടീം ലക്ഷ്യമിടുന്നത്. ലോകകപ്പ് അവിശ്വസനീയമായ ടൂര്‍ണമെന്റാണ്. ആരാധകര്‍ ഏറ്റവും വൈകാരികമായി സമീപിക്കുന്ന പോരാട്ടങ്ങളാണ് വരാനിരിക്കുന്നത്. അവിടെ ആരാധകരുടെ സ്വപ്നങ്ങള്‍ സാക്ഷാത്കരിക്കാന്‍ ടീം എല്ലാം നല്‍കാന്‍ തയ്യാറാണ്. കോലി പറഞ്ഞു.

ഞങ്ങള്‍ ഒരു യാത്രയ്ക്ക് തുടക്കം കുറിക്കുകയാണ്. മുഴുവന്‍ രാജ്യവും ഞങ്ങള്‍ക്കൊപ്പം സഞ്ചരിക്കുമെന്ന് ഉറപ്പാണ്. മികച്ച പ്രകടനം നടത്തി രാജ്യത്തിന്റെ അഭിമാനങ്ങളാകുവാന്‍ ഞങ്ങള്‍ തീരുമാനിച്ചിട്ടുണ്ട്. കോലി പറയുന്നു.