ലോക ടെസ്റ്റ് ചാമ്പ്യൻഷിപ്പിൽ ഒന്നാം സ്ഥാനത്തെത്തി ടീം ഇന്ത്യ. 14 പോയന്റുകളോടെയാണ് ഇന്ത്യ ഒന്നാം സ്ഥാനത്ത് തുടരുന്നത്. ലോർഡ്‌സ് ക്രിക്കറ്റ് ടെസ്റ്റിൽ ഇംഗ്ലണ്ടിനെതിരെ നേടിയ വിജയമാണ് ഇന്ത്യയെ പോയന്റ് പട്ടികയിൽ ഒന്നാമതെത്താൻ സഹായിച്ചത്.
മഴ മുടക്കിയ ആദ്യ ടെസ്റ്റിൽ ഇന്ത്യക്കും ഇംഗ്ലണ്ടിനും 4 പോയന്റുകളാണ് ലഭിച്ചത്. 6 പോയന്റുകളാണ് മത്സരം ടൈ ആയെങ്കിൽ ലഭിക്കുക. കളി മുടങ്ങുകയാണെങ്കിൽ 4 പോയിന്റ് ഇരു ടീമുകൾക്കും ലഭിക്കും. കുറഞ്ഞ ഓവർ നിരക്ക് കാരണം ഇരുടീമുകൾക്കും രണ്ട് പോയന്റ് നഷ്ടപ്പെടുകയായിരുന്നു.ഇതോടെയാണ് ഇന്ത്യയുടെ പോയന്റ് 14 ആയി ചുരുങ്ങിയത്. ചാമ്പ്യൻഷിപ്പിൽ ഒരു ടെസ്റ്റ് വിജയിച്ചാൽ 12 പോയന്റാണ് ലഭിക്കുക. ടൈ ആയാൽ 6 പോയന്റ് വീതവും ലഭിക്കും. 12 പോയിന്റുമായി പാകിസ്ഥാനാണ് ഇന്ത്യയ്ക്ക് പിന്നിൽ രണ്ടാമതുള്ളത്.
രണ്ട് പോയന്റുമായി ഇംഗ്ലണ്ട് നാലാമതാണ്. 2023 വരെയാണ് രണ്ടാം ലോക ടെസ്റ്റ് ചാമ്പ്യൻഷിപ്പ് നടക്കുക. പ്രഥമ ലോക ടെസ്റ്റ് ചാമ്പ്യൻഷിപ്പ് ഫൈനലിൽ ഇന്ത്യയെ തോൽപ്പിച്ച് ന്യൂസിലൻഡ് കിരീടം നേടിയിരുന്നു.
