മുംബൈ: ഫുട്‌ബോളിലെ താരങ്ങളെ ചൊല്ലി താനും ഇന്ത്യൻ നായകൻ കോഹ്‌ലിയും തമ്മിൽ തർക്കങ്ങൾ ഉണ്ടാകാറുണ്ട് എന്ന് തുറന്നുപറഞ്ഞ് ഇന്ത്യൻ സ്പിന്നർ കുൽദീപ് യാദവ്. ഫൂട്ബോളിൽ ഇരുവരുടെയും ഇഷ്ട താരങ്ങൾ വേവ്വേറെ എന്നതാണ് ഇതിന് കാരണം എന്നും കുൽദീപ് പറയുന്നു. കോഹ്‌ലിയുടെ പ്രിയപ്പെട്ട താരം ക്രിസ്റ്റ്യന്നോ റൊണാൾഡോയും, കുൽദീപിന്റേത് നെയ്മറുമാണ് എന്നതാണ് തർക്കങ്ങൾക്ക് കാരണം.
2012ലെ ബ്രസീല്‍-സ്‌പെയ്‌ന്‍ മത്സരമാണ്‌ ആദ്യമായി ഞാൻ കണ്ട ഫുട്‌ബോള്‍ മത്സരം. അതിൽ നെയ്‌മര്‍ കളിച്ചിരുന്നു. അന്നാണ് നെയ്മറുടെ കളി ആദ്യമായി കാണുന്നത്. മികച്ച കളിക്കാരനാണ്‌ നെയ്‌മര്‍ എന്ന് അന്നുതന്നെ എനിക്ക്‌ മനസിലായി. കഴിവും ക്വാളിറ്റിയുമുള്ള താരമാണ്‌ നെയ്‌മര്‍. അന്ന്‌ മുതല്‍ നെയ്‌മറാണ്‌ എന്റെ പ്രിയപ്പെട്ട ഫൂട്ബോൾ താരം. എന്നാൽ നെയ്മറെ ഒരുപാട് പേർക്ക് ഇഷ്ടമല്ല.
ഞാനും കോഹ്‌ലിയും തമ്മില്‍ ഇതിന്റെ പേരില്‍ വാക്കുർക്കം ഉണ്ടാകാറുണ്ട്, കാരണം കോഹ്‌ലിയുടെ പ്രിയപ്പെട്ട താരം ക്രിസ്റ്റ്യാനോയാണ്‌, കുല്‍ദീപ്‌ പറഞ്ഞു. ബാഴ്‌സലോണയാണ്‌ എന്റെ പ്രിയപ്പെട്ട ക്ലബ്‌. പോര്‍ച്ചുഗലിന്‌ വേണ്ടി ക്രിസ്‌റ്റിയാനോ ഹാട്രിക്‌ നേടിയ വീഡിയോയുമായി ഒരിക്കൽ കോഹ്‌ലി എന്റെ അടുത്തുവന്നു. അന്ന്‌ വൈകുന്നേരം മെസിയും ഹാട്രിക്‌ നേടി. ഞാന്‍ കോഹ്‌ലിയെ ആ വീഡിയോയും കാണിച്ചു.
