‘അടുത്തലക്ഷ്യം നിന്റെ തല’; ഓസ്‌ട്രേലിയന്‍ താരത്തിനുനേരെ കൊലവിളി
‘അടുത്തലക്ഷ്യം നിന്റെ തല’; ഓസ്‌ട്രേലിയന്‍ താരത്തിനുനേരെ കൊലവിളി
ഓസ്‌ട്രേലിയന്‍ താരങ്ങള്‍ മടങ്ങിയ ബസിനുനേരെ അജ്ഞാതർ കല്ലെറിഞ്ഞ സംഭവം ഇന്ത്യന്‍ ക്രിക്കറ്റിന് നാണക്കേടായതിന് പിന്നാലെ കൊലവിളിയുമായി ആരാധകന്‍ രംഗത്ത്.
ഓസ്‌ട്രേലിയന്‍ സ്‌പിന്നര്‍ ആദം സാമ്പയ്‌ക്കു നേരെയാണ് ജിത്ത് ജോണിയെന്ന ഇന്ത്യന്‍ ആരാധകന്‍ സോഷ്യല്‍ മീഡിയയിലൂടെ കൊലവിളി നടത്തിയത്. അടുത്തലക്ഷ്യം നിന്റെ തലയാണെന്നായിരുന്നു ഇയാളുടെ പ്രസ്‌താവന. ഇന്ത്യന്‍ ആരാധകന്റെ കമന്റ് സോഷ്യല്‍ മീഡിയയില്‍ വൈറലായിരിക്കുകയാണ്.
ഇന്ത്യക്കെതിരായ രണ്ടാം ട്വന്റി-20 മൽസരത്തിനുശേഷം ഓസ്‌ട്രേലിയന്‍ താരങ്ങള്‍ ഹോട്ടലിലേക്ക് മടങ്ങുമ്പോഴാണ് ബസിനുനേരെ അജ്ഞാതർ കല്ലെറിഞ്ഞത്. അസമിലെ ബർസാപര ക്രിക്കറ്റ് സ്റ്റേഡിയത്തില്‍ നിന്ന് താരങ്ങള്‍ മടങ്ങുമ്പോഴാണ് ആക്രമം. സംഭവവുമായി ബന്ധപ്പെട്ട് പൊലീസ് രണ്ടുപേരെ പിടികൂടി.
കല്ലേറില്‍ ബസിന്റെ ചില്ലു തകർന്നു. ഇതിന്റെ ചിത്രം ഓസീസ് താരം ആരോൺ ഫിഞ്ച് സമൂഹമാധ്യമത്തിൽ പോസ്റ്റ് ചെയ്തതോടെയാണ് സംഭവം പുറംലോകമറിഞ്ഞത്. ആക്രമണത്തില്‍ ആർക്കും പരുക്കേറ്റിട്ടില്ല. കല്ലേറ് ഓസീസ് താരങ്ങളെ ഭയചകിതരായി. തുടര്‍ന്ന് കൂടുതൽ സുരക്ഷാ ഉദ്യോഗസ്ഥരെത്തി ടീമംഗങ്ങളെ സുരക്ഷിതമായി താമസസ്ഥലത്തെത്തിച്ചു.
