സ്ത്രീധനത്തിന്റെ പേരിൽ കൊടും ക്രൂരതയാണ് ബീഹാറിൽ 22കാരിക്ക് നേരിടേണ്ടി വന്നത്. അതി ക്രൂരമായ രീതിയിൽ മർദ്ദിക്കുകയും വേദന അനുഭവിപ്പിക്കുകയും ചെയ്ത ശേഷം ബോധരഹിതയായ യുവതിയെ ഒടുവിൽ ഭർത്താവും ബന്ധുക്കളും ചേർന്ന് റെയിൽവേ ട്രാക്കിൽ തള്ളുകയും ചെയ്തു. ബീഹാറിലെ ഗോപാൽഗഞ്ച് ജില്ലയിലാണ് ആരെയും ഞെട്ടിക്കുന്ന സംഭവം അരങ്ങേറിയത്.
രണ്ട് ലക്ഷം രൂപയും ഒരു ബൈക്കും സ്ത്രീധനമായി നൽകണം എന്ന് വിവാഹ സമയത്ത് ഭർത്താവും കുടുംബവും ആവശ്യപ്പെട്ടിരുന്നു. എന്നാൽ ഇത് നൽകുന്നതിൽ മുടക്കം വരുത്തിയതോടെ ഭർത്താവും വീട്ടുകാരും ചേർന്ന് യുവതിയെ പീഡിപ്പിക്കുന്നത് പതിവായിരുന്നു.
സ്ത്രീധനത്തിന്റെ പേരു പറഞ്ഞുള്ള വഴക്കിൽ ഭർത്താവും സഹോദരനും മറ്റു കുടുംബാംഗങ്ങളും കേട്ടാലറക്കുന്ന ക്രൂരതയാണ് പെൺകുട്ടിയോട് കാട്ടിയത്. 22കാരിയുടെ നഖവും മുടിയും പറിച്ചെടുത്തും, ഇരുമ്പ് ദണ്ഡ് ഉപയോഗിച്ച് ശരീരമാസകലം പൊള്ളിച്ചുമെല്ലാമായിരുന്നു ഇവരുടെ ക്രൂര ആക്രമണം. ആക്രമണങ്ങളെ തുടർന്ന് ബോധരഹിതയായ യുവതിയെ പിന്നീട് ഇവർ റെയിൽവേ ട്രാക്കിൽ തള്ളി.
ബോധം തെളിഞ്ഞ യുവതി ഏറെ പണിപ്പെട്ടാണ് ആളുകളുടെ സഹായം തേടിയത്. ആളുകൾ ഇവരെ ഉടൻ ആശുപത്രിയെലെത്തിച്ചു. യുവതിയുടെ നില ഗുരുതരമായി തുടരുകയാണ്. 22കാരിയുടെ ശരീരത്തിൽ ആഴത്തിലുള്ള ഏഴ് മുറിവുകളും, ശരീരമാസകലം പൊള്ളലേറ്റതിന്റെ പാടുകളും ഉണ്ട് എന്ന് ഡോക്ടർ വ്യക്തമാക്കി. സംഭവത്തിൽ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.
