പ്രണയത്തിനു തടസം നിന്ന ഭാര്യയെ വെടിവച്ചു കൊന്ന ഭര്‍ത്താവും കാമുകിയും ഉള്‍പ്പെടെ മൂന്നു പേര്‍ അറസ്റ്റില്‍. സ്‌കൂള്‍ അധ്യാപികയായ സുനിതയാണ് (38) കൊല്ലപ്പെട്ടത്. സംഭവത്തില്‍ ഇവരുടെ ഭര്‍ത്താവ് മന്ജീത്, മോഡലായ കാമുകി എയ്ഞ്ചല്‍ ഗുപ്‌ത, രാജീവ് എന്നിവരാണ് പിടിയിലായത്.
വടക്കുപടിഞ്ഞാറന്‍ ഡല്‍ഹിയിലെ ബവാനയില്‍ കഴിഞ്ഞ തിങ്കളാഴ്‌ചയാണ് സംഭവം. എയ്ഞ്ചലുമായുള്ള മന്ജീതിന്റെ ബന്ധം സുനിത ചോദ്യം ചെയ്‌തിരുന്നു. ഇക്കാര്യത്തില്‍ ഇരുവരും തമ്മില്‍ വഴക്ക് രൂക്ഷമായതോടെ സുനിതയെ കൊലപ്പെടുത്താന്‍ മന്ജീത് വാടകക്കൊലയാളികളെ ഏര്‍പ്പെടുത്തുകയായിരുന്നു.
തിങ്കളാഴ്‌ച സ്‌കൂളിലേക്കു പോകുകയായിരുന്ന സുനിതയെ അക്രമികള്‍ വെടിവച്ചു വീഴ്‌ത്തുകയായിരുന്നു. മൂന്ന് തവണ വെടിയേറ്റ സുനിതയെ ആശുപത്രിയിലെത്തിച്ചെങ്കിലും രക്ഷിക്കാനായില്ല.
സുനിതയുടെ മരണത്തില്‍ മന്ജീതിന്റെ ബന്ധമുണ്ടെന്ന് ബന്ധുക്കള്‍ ആരോപിച്ചതോടെയാണ് അന്വേഷണം വഴിമാറിയത്. സുനിതയുടെ ഡയറിക്കുറിപ്പുകളില്‍ എയ്ഞ്ചലുമായുള്ള മന്ജീതിന്റെ വഴിവിട്ട ബന്ധത്തെക്കുറിച്ച് പരാമര്‍ശം ഉള്ളതായി പൊലീസ് കണ്ടെത്തിയതോടെയാണ് സംഭവത്തിനു പിന്നില്‍ ഭര്‍ത്താവ് തന്നെയാണെന്ന് വ്യക്തമായത്.
മന്‍ജീതിനും സുനിതയ്ക്കും രണ്ടു മക്കളുണ്ട്. കുട്ടികള്‍ക്കും മന്ജീതിന്റെ അവിഹിത ബന്ധത്തെക്കുറിച്ച് അറിയാമായിരുന്നു.