ഐപിഎല്‍ വാതുവെപ്പിനെ എതിര്‍ത്തു; യുവതിയെ ഭര്‍ത്താവും ബന്ധുക്കളും ചേര്‍ന്ന് ആസിഡ് കുടിപ്പിച്ച് കൊന്നു

ഐപിഎല്‍ വാതുവെപ്പില്‍ ഏര്‍പ്പെടുന്നതിനെ എതിര്‍ത്ത യുവതിയെ ഭര്‍ത്താവും ബന്ധുക്കളും ചേര്‍ന്ന് ആസിഡ് കുടിപ്പിച്ച് കൊലപ്പെടുത്തിയെന്ന് പരാതി. പശ്ചിമ ബംഗാളിലെ മാല്‍ഡയിലാണ് സംഭവം. അര്‍പ്പിത ദാസ് ഗുപ്‌ത എന്ന യുവതിയാണ് മരിച്ചത്.

ബുധനാഴ്‌ച രാത്രി അബോധാവസ്ഥയില്‍ കണ്ടെത്തിയ അര്‍പ്പിതയെ സമീപവാസികളാണ് ആശുപത്രിയില്‍ എത്തിച്ചത്. ചികിത്സ നല്‍കിയെങ്കിലും യുവതി മരിച്ചു.

അര്‍പ്പിതയുടെ പിതാവ് സന്തോഷ് ദത്ത നല്‍കിയ പരാതിയില്‍ കേസ് രജിസ്‌റ്റര്‍ ചെയ്‌ത പൊലീസ് യുവതിയുടെ ഭര്‍ത്താവ് ശന്തനു മിത്രയ്ക്കും നാല് ബന്ധുക്കള്‍ക്കും എതിരെ കേസെടുത്തു.

വാതുവപ്പില്‍ പങ്കെടുക്കരുതെന്ന് ബുധനാഴ്ച രാത്രിയും അര്‍പിത ഭര്‍ത്താവിനോട് അഭ്യര്‍ഥിച്ചിരുന്നു.
ഇതിന്റെ പേരില്‍ ഇരുവരും തമ്മില്‍ വാക്കേറ്റമുണ്ടായി.

അതിനിടെ, ഭര്‍ത്താവും ബന്ധുക്കളും ചേര്‍ന്ന് അര്‍പ്പിതയെ ബലം പ്രയോഗിച്ച് ആസിഡ് കുടിപ്പിച്ചുവെന്നാണ് പരാതി. ഇതിനുശേഷം ഭര്‍ത്താവ് ശന്തനു മിശ്രയും ബന്ധുക്കളും വീട്ടില്‍നിന്ന് രക്ഷപ്പെട്ടു.