ഭര്‍ത്താവിനെ വെട്ടിക്കൊല്ലാന്‍ ശ്രമിച്ച ശേഷം യുവതി ആത്മഹത്യക്ക് ശ്രമിച്ചു !
നാട്ടുകാര്‍ വിവരമറിയിച്ചതിനെതുടര്‍ന്ന് സ്ഥലത്ത് എത്തിയ പൊലീസും ഫയര്‍ഫോഴ്‌സും ചേര്‍ന്ന് ഷീലയെ രക്ഷപ്പെടുത്തി
ഭര്‍ത്താവിനെ വെട്ടിക്കൊല്ലാന്‍ ശ്രമിച്ചതിനു പിന്നാലെ കുളത്തില്‍ ചാടി ആത്മഹത്യയ്ക്ക് ശ്രമിച്ച് യുവതി. കുമ്മിള്‍ സ്വദേശി രാമചന്ദ്രനാണ് വെട്ടേറ്റത്. ഭാര്യ ഷീലയാണ് ആത്മഹത്യയ്ക്ക് ശ്രമിച്ചത്. രാമചന്ദ്രന്‍ മദ്യപിച്ചെത്തി വഴക്കുണ്ടാക്കുക പതിവാണെന്ന് അയല്‍വാസികള്‍ പറയുന്നു. കുറച്ച് മാസങ്ങള്‍ക്ക് മുന്‍പ് ഇയാളെ ലഹരി വിമുക്ത കേന്ദ്രത്തില്‍ എത്തിക്കുകയും മദ്യപാനം അവസാനിപ്പിക്കുകയും ചെയ്തിരുന്നു.
എന്നാല്‍ ഒരാഴ്ച മുന്‍പ് മുതല്‍ രാമചന്ദ്രന്‍ വീണ്ടും മദ്യപിച്ചു തുടങ്ങിയെന്നും തിങ്കളാഴ്ച രാത്രി മകളെ അടക്കം അക്രമിക്കാന്‍ ശ്രമിച്ചെന്നും അയല്‍വാസികള്‍ പറയുന്നു. തുടര്‍ന്ന് ചൊവ്വാഴ്ച രാത്രിയുണ്ടായ തര്‍ക്കത്തിനിടെ രാമചന്ദ്രന്‍ ഭാര്യയെ വാളെടുത്ത് വെട്ടാന്‍ ശ്രമിക്കുകയായിരുന്നു. ഉടനെ ഷീല വാള്‍ പിടിച്ചുവാങ്ങി മുഖത്തും കൈയിലും കഴുത്തിലും വെട്ടുകയായിരുന്നു.
പിന്നാലെ ഷീല കിണറ്റില്‍ ചാടി ആത്മഹത്യയ്ക്ക് ശ്രമിച്ചു. നാട്ടുകാര്‍ വിവരമറിയിച്ചതിനെതുടര്‍ന്ന് സ്ഥലത്ത് എത്തിയ പൊലീസും ഫയര്‍ഫോഴ്‌സും ചേര്‍ന്ന് ഷീലയെ രക്ഷപ്പെടുത്തി. കടയ്ക്കല്‍ താലൂക്ക് ആശുപത്രിയില്‍ പ്രവേശിപ്പിച്ച ഇരുവരെയും വിദ്ഗധ ചികിത്സയ്ക്കായി പാരിപ്പള്ളി മെഡിക്കല്‍ കോളജിലേക്ക് മാറ്റിയിട്ടുണ്ട്.
