പ്രതീക്ഷയുമായി അർജന്റീന; ലയണൽ മെസി ഇന്ന് തിളങ്ങുമോ?
പിറന്നാൾ ആഘോഷിക്കാൻ മെസിക്ക് കഴിയുമോ? - ഇന്നറിയാം
റഷ്യ ലോകകപ്പില്‍ നോക്കൗട്ട്‌ പ്രതീക്ഷകളുമായി മുന്‍ ചാമ്പ്യന്‍ അര്ജന്റീന ഇന്നിറങ്ങും. ഡി ഗ്രൂപ്പിലെ രണ്ടാംറൗണ്ട്‌ പോരാട്ടത്തില്‍ ക്രയേഷ്യയാണ്‌ അര്‍ജന്റീനയെ നേരിടുക. ഐസ്ലന്‍ഡിനെതിരേ നടന്ന ഒന്നാം റൗണ്ട്‌ മത്സരം 1-1 നു സമനിലയില്‍ അവസാനിച്ച ക്ഷീണത്തിലാണ്‌ അര്ജന്റീന.
അതേസമയം, നൈജീരിയെ 2-0 ത്തിനു തോല്‍പ്പിച്ച ആത്മവിശ്വാസവുമായാണു ക്രയേഷ്യ ഇന്ന് കളത്തിലിറങ്ങുക. ഐസ്ലന്‍ഡിനെതിരേ പെനാല്റ്റി പാഴാക്കി രൂക്ഷ വിമര്‍ശനം നേരിട്ട സൂപ്പര്‍ താരം ലയണല്‍ മെസി ഇന്നു തിളങ്ങുമെന്ന പ്രതീക്ഷയിലാണു ലോകമെമ്പാടുമുള്ള ആരാധകര്‍.
ജൂൺ 24നാണ് മെസിയുടെ ജന്മദിനം. തന്റെ 31ആം ജന്മദിനം ആഘോഷിക്കുന്ന മെസിക്ക് ടീമിനെ നോക്കൗട്ടിലെത്തിച്ച്‌ തങ്ങള്‍ക്ക്‌ ഉചിതമായ സമ്മാനം നല്‍കുമെന്നാണ്‌ ആരാധകരുടെ പ്രതീക്ഷ.
പ്രതിഭാ സമ്പത്ത്‌ ഏറെയുണ്ടെങ്കിലും അര്‍ജന്റീനക്കാര്‍ക്കു ക്രയേഷ്യന്‍ പ്രതിരോധം തകര്‍ത്തു ഗോളടിച്ചു കൂട്ടാനാകില്ലെന്നാണു കളിയെഴുത്തുകാരുടെ വിലയിരുത്തല്‍. പൗലോ ഡൈബാല, ഗൊണ്‍സാലോ ഹിഗ്വേയിന്‍, സെര്‍ജിയോ അഗ്യൂറോ, എയ്‌ഞ്ചല്‍ ഡി മരിയ തുടങ്ങിയ പ്രതിഭകള്‍ ഏറെയുണ്ടെങ്കിലും ലോകകപ്പ്‌ യോഗ്യതാ റൗണ്ട്‌ കടക്കാന്‍ അര്ജന്റീന ഏറെ വിയര്‍ത്തു.
32 വര്‍ഷം മുമ്പാണ്‌ അര്ജന്റീന അവസാനം ലോക കിരീടം നേടിയത്‌. ഐസ്ലന്‍ഡിനെക്കാള്‍ അനുഭവസമ്പത്തുള്ള താരങ്ങളാണു ക്രയേഷ്യന്‍ നിരയില്‍. ടീമിലുള്ളവർ അര്‍ജന്റീനക്കാരെ വിറപ്പിക്കാന്‍ പോന്നവരാണ്‌.
