ഹൊറർ-കോമഡി വിഭാഗത്തിൽ പെടുന്ന സിനിമകളെ എക്കാലവും തമിഴ് പ്രേക്ഷകർ ഇരുകൈയും നീട്ടി സ്വീകരിച്ചിട്ടുണ്ട്. ഒടുവിൽ പ്രദർശനത്തിന് എത്തിയ സുന്ദർ സി ചിത്രം അരൺമനൈ 4 വൻ വിജയമായി മാറിക്കഴിഞ്ഞു. 2024ന്റെ തുടക്കത്തിൽ ലഭിച്ച കുതിപ്പ് കോളിവുഡിന് അഞ്ചു മാസങ്ങൾ പിന്നിടുമ്പോഴും തിരിച്ചുപിടിക്കാൻ ആയില്ല.അരൺമനൈ 4 തമിഴ് സിനിമ ലോകത്തിന് പുതുശ്വാസം നൽകിയിരിക്കുകയാണ്. ഒരാഴ്ച കൊണ്ട് തന്നെ 50 കോടി ഗ്രോസ് കളക്ഷൻ ചിത്രം നേടി കഴിഞ്ഞു.
7 ദിവസത്തിനുള്ളിൽ തമിഴ്‌നാട്ടിൽ നിന്ന് മാത്രം 32 കോടിയാണ് സിനിമ നേടിയിരിക്കുന്നത്. പൊങ്കൽ റിലീസ് ചിത്രങ്ങളായ അയലൻറെയും, ക്യാപ്റ്റൻ മില്ലറുടെയും കളക്ഷൻ അരൺമനൈ 4 വൈകാതെ മറികടക്കും.ആഭ്യന്തര കളക്ഷൻ പരിഗണിക്കുമ്പോൾ ചിത്രം 40 കോടി കടന്നിട്ടുണ്ട്. ആഗോള കളക്ഷൻ കൂടി എടുക്കുമ്പോൾ ചിത്രം 51 കോടി പിന്നിട്ടുവെന്നാണ് പുതിയ റിപ്പോർട്ടുകൾ.
സംവിധായകനായ സുന്ദർ സി തന്നെയാണ് പ്രധാന കഥാപാത്രത്തെ അവതരിപ്പിച്ചത്. തമന്നയും റാഷി ഖന്നയും ആയിരുന്നു നായികമാർ.സന്തോഷ് പ്രതാപ്, രാമചന്ദ്ര രാജു, കോവൈ സരള, യോഗി ബാബു, കെ എസ് രവികുമാർ, ജയപ്രകാശ്, വിടിവി ഗണേഷ്, ഡൽഹി ഗണേഷ്, രാജേന്ദ്രൻ, സിംഗംപുലി എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചത്.അരൺമനൈ ( 2014) , അരൺമനൈ 2 (2016) , അരൺമനൈ 3 (2021) തുടങ്ങിയ സിനിമകൾ സംവിധാനം ചെയ്ത് അഭിനയിച്ചത് സുന്ദർ സിയാണ്.
