ബേസില്‍ ജോസഫിനെ നായകനാക്കി പുതിയ സിനിമ പ്രഖ്യാപിച്ച് ജീത്തു ജോസഫ്.'നുണക്കുഴി'എന്നാണ് ചിത്രത്തിന് പേരിട്ടിരിക്കുന്നത്.കെ ആര്‍ കൃഷ്ണകുമാറാണ് തിരക്കഥ ഒരുക്കിയിരിക്കുന്നത്.'കൂമന്‍ ','ട്വല്‍ത്ത് മാന്‍' ന് ശേഷം ജീത്തു ജോസഫിനൊപ്പം കൃഷ്ണകുമാര്‍ ഒന്നിക്കുന്ന മൂന്നാമത്തെ സിനിമ കൂടിയാണിത്.
ഡാര്‍ക്ക് ഹ്യുമര്‍ ജോണറില്‍പ്പെട്ട സിനിമയാണിത്. ബേസിലും ജിത്തുവും ഒന്നിക്കുമ്പോള്‍ പ്രതീക്ഷകള്‍ വലുതാണ്. നേര് എന്ന സിനിമയ്ക്ക് ശേഷം സിനിമയുടെ ജോലികളിലേക്ക് സംവിധായകന്‍ കടക്കും. സരിഗമയും ജീത്തു ജോസഫിന്റെ വിന്റേജ് ഫിലിംസും ചേര്‍ന്നാണ് സിനിമ ഒരുക്കുന്നത്. വിക്രം മെഹര്‍, സിദ്ധാര്‍ത്ഥ ആനന്ദ് കുമാര്‍ എന്നിവരാണ് നിര്‍മ്മാതാക്കള്‍.
ഗ്രേസ് ആന്റണിയാണ് നായിക.സിദ്ദിഖ്, മനോജ് കെ ജയന്‍, ബൈജു, അജു വര്‍ഗീസ്, സൈജു കുറുപ്പ്, ബിനു പപ്പു, പ്രമോദ് വെളിയനാട്, അസീസ് നെടുമങ്ങാട് തുടങ്ങിയവരാണ് മറ്റു പ്രധാന വേഷങ്ങളില്‍ എത്തുന്നത്.
സതീഷ് കുറുപ്പ് ഛായാഗ്രഹണവും വിനായക് വി എസ് എഡിറ്റിങ്ങും നിര്‍വഹിക്കുന്നു.സഹില്‍ ശര്‍മയാണ് സഹ നിര്‍മ്മാതാവ്. സൂരജ് കുമാറാണ് എക്‌സിക്യൂട്ടീവ് പ്രൊഡ്യൂസര്‍.
