നടി ആക്രമിക്കപ്പെട്ട കേസിൽ ജാമ്യത്തിലിറങ്ങിയ ദിലീപ് തിരക്കിലാണ്. മുരളി ഗോപിയുടെ കമ്മാര സംഭവത്തിലാണ് ദിലീപ് ഇപ്പോൾ അഭിനയിച്ചു കൊണ്ടിരിക്കുന്നത്. അതിനുശേഷം പ്രൊഫസർ ഡിങ്കൻ എന്ന ചിത്രത്തിന്റെ രണ്ടാമത്തെ ഷെഢ്യൂളിലേക്ക് ദിലീപ് കടക്കുമെന്നാണ് റിപ്പോർട്ട്.
അതേസമയം, ഇനിമുതൽ സംവിധായകരോടോ നിർമാതാക്കളോടോ മറ്റ് നടന്മാരോടോ ഉള്ള കടപ്പാടിന്റെ പേരിൽ ഒരു സിനിമയ്ക്കും ദിലീപ് ഡേറ്റ് നൽകില്ലെന്ന് സൂചന. ദിലീപിന്റെ ഒഫീഷ്യൽ ഫാൻസിന്റെ ഫേസ്ബുക്ക് പേജായ ദിലീപ് ഓൺലൈനാണ് ഇക്കാര്യം അറിയിച്ചിരിക്കുന്നത്. 'ദിലീപേട്ടൻ ഇനിമുതൽ ആരുടെയും കടപ്പാടിന്റെ പേരിൽ സിനിമ ചെയ്യാൻ പാടില്ലെന്നാണ് എന്റെ അഭിപ്രായമെന്ന്' കമന്റ് ചെയ്ത വ്യക്തിയ്ക്ക്, 'ഇനി ചെയ്യില്ല' എന്ന് ദിലീപ് ഓൺലൈൻ മറുപടി നൽകുകയായിരുന്നു.
ദിലീപിന്റെ നിലപാട് തന്നെയാകും ദിലീപ് ഓൺലൈൻ വ്യക്തമാക്കിയതെന്നാണ് ഫാൻസ് പറയുന്നത്. ഏതായാലും താരത്തിന്റെ ഫാൻസിന്റേയും ആഗ്രഹം അത് തന്നെയാണ്. മുരളി ഗോപിയുടെ തിരക്കഥയിൽ രതീഷ് അമ്പാട്ട് സംവിധാനം ചെയ്യുന്ന കമ്മാര സംഭവത്തിന്റെ സംഗീതം നിർവഹിക്കുന്നത് ഗോപിസുന്ദറാണ്.