ബിഗ് ബിയിലെ മമ്മൂട്ടിയുടെ ആ ഡയലോഗ് ശരിയല്ല: കമല്‍
പാര്‍വതിക്ക് പിന്നാലെ മമ്മൂട്ടി ചിത്രത്തെ വിമര്‍ശിച്ച് കമല്‍
മമ്മൂട്ടിയുടെ എക്കാലത്തേയും ഹിറ്റ് ചിത്രങ്ങളില്‍ ഒന്നായ ബിഗ് ബിയിലെ സംഭാഷണത്തെ വിമര്‍ശിച്ച സംവിധായകന്‍ കമല്‍. നടി പാർവതിക്ക് പിന്നാലെ ഇതാദ്യമായാണ് ഒരാള്‍ മമ്മൂട്ടിച്ചിത്രത്തിലെ സംഭാഷണത്തെ പരസ്യമായി വിമർശിച്ച് രംഗത്തെത്തുന്നത്.
ബിഗ് ബി എന്ന ചിത്രത്തിൽ കൊച്ചിയെക്കുറിച്ച‌ുള്ള മമ്മൂട്ടിയുടെ സംഭാഷണമാണ് കമലിന് ദഹിക്കാത്തത്. സംഭാഷണം തെറ്റിദ്ധരിപ്പിക്കുന്നതാണെന്നാണ് കമല്‍ ആരോപിക്കുന്നത്. ‘കൊച്ചി പഴയ കൊച്ചിയല്ലെന്നറിയാം, പക്ഷേ ബിലാല് പഴയ ബിലാല് തന്നെയാണ്’ എന്നാണ് ചിത്രത്തില്‍ മമ്മൂട്ടി അവതരിപ്പിക്കുന്ന ബിലാല് പറയുന്നത്.
ഈ ഡയലോഗിനോട് തീര്‍ത്തും വിയോജിക്കുന്ന ആളാണ് താനെന്ന് കമല്‍ പറയുന്നു. ‘കൊച്ചി പഴയ കൊച്ചി ആണ്. കൊച്ചി പഴയ കൊച്ചി അല്ലെന്ന് സിനിമയിലൂടെ പറയുമ്പോള്‍ അത് പുതിയ തലമുറയ്ക്ക് നല്‍കുന്നത് തെറ്റായ ധാരണയാണ്‘. - കമല്‍ പറഞ്ഞു.
ഫോർട്ടുകൊച്ചിയിലെ ഇസ്്ലാമിക് ഹെറിട്ടേജ് സെന്റർ ഉദ്ഘാടനച്ചടങ്ങിൽ മുഖ്യാതിഥിയായിരുന്നു അദ്ദേഹം.
