ജോജുവിന് പകരം ലാൽ, പക്ഷേ മ്ലേച്ഛമായ കഥാപാത്രമെന്ന് പറഞ്ഞ് ലാൽ നിരസിച്ചു! - ചോലയിലെ അറിയാക്കഥകൾ
‘ഇത്തരം മ്ലേച്ഛമായ കഥാപാത്രം ചെയ്യാനാണോ നിങ്ങൾ എന്നെ സമീപിച്ചത്‘ ?- ജോജുവിന് മുൻപ് കഥ പറഞ്ഞത് ലാലിന്റെ അടുത്ത്
'ഒഴിവുദിവസത്തെ കളി'ക്കും 'എസ് ദുർഗ'ക്കും ശേഷം സനൽ കുമാർ ശശിധരൻ സംവിധാനം ചെയ്ത ചിത്രമാണ് ‘ചോല’. ജോജു ജോർജും നിമിഷ സജയനും ആണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചത്. സംസ്ഥാന ചലച്ചിത്ര അവാര്‍ഡില്‍ നിരവധി പുരസ്കാരങ്ങള്‍ക്ക് അര്‍ഹമായ ചിത്രം കൂടിയാണ് ചോല. സനൽകുമാര്‍ ശശീധരന് ജൂറിയുടെ പ്രത്യേക പരാമര്‍ശവും, ചോലയിലെ അഭിനയത്തെ കൂടി പരിഗണിച്ച് നിമിഷ വിജയനെ മികച്ച നടിയായും ജോജു ജോര്‍ജിനെ മികച്ച സ്വഭാവ നടനായും തെരഞ്ഞെടുത്തു.
എന്നാൽ, ചോലയിലെ നായകനാകേണ്ടിയിരുന്നത് ജോജു അല്ലെന്നും നടൻ ലാൽ ആണെന്നും സംവിധായകൻ സനൽ കുമാർ ശശിധരൻ പറയുന്നു. ജോജുവിന്റെ കഥാപാത്രമായി ആദ്യം മനസിൽ കണ്ടത് ലാലിനെ ആയിരുന്നു. ഒരിക്കൽ സംവിധായകൻ ലാലിനെ സമീപിച്ച് കഥ പറഞ്ഞു. എന്നാൽ, അദ്ദേഹത്തിന്റെ മറുപടി ‘ഇത്തരം മ്ലേച്ഛമായ കഥാപാത്രം ചെയ്യാനാണോ നിങ്ങൾ എന്നെ സമീപിച്ചത്, നിങ്ങൾക്കിത് എന്നെ വെച്ച് എങ്ങനെ ആലോചിക്കാൻ സാധിച്ചു‘ എന്നായിരുന്നു. ഒടുവിൽ അത് ചെയ്യാൻ പറ്റില്ല എന്ന് പറഞ്ഞ് സംവിധായകനെ തിരിച്ചയക്കുകയായിരുന്നു ലാൽ.
അഴിമുഖത്തിന് നൽകിയ പ്രത്യേക അഭിമുഖത്തിലാണ് സനൽ കുമാർ ഇക്കാര്യം വെളിപ്പെടുത്തിയത്. വർഷങ്ങൾക്ക് മുൻപാണ് സംഭവമെന്നും അദ്ദേഹം പറയുന്നു. എന്നാൽ, ചിത്രത്തിന്റെ കഥ കേട്ടതും ചെയ്യാമെന്ന് ഏൽക്കുകയായിരുന്നു ജോജുവെന്ന് സംവിധായകൻ പറയുന്നു. ‘നിമിഷയും അതു പോലെയാണ്. ഇവരുടെയൊക്കെ സൗന്ദര്യം എന്നു പറയുന്നത് ഇവർ ചെയ്യുന്ന ജോലിയോടുള്ള ആത്മാർത്ഥമായ സ്വയം സമർപ്പണമാണ്.‘ - സംവിധായകൻ വ്യക്തമാക്കി.
