‘കീർത്തി... ഇത് നിന്റെ സിനിമയാണ്, നീയാണ് താരം’ - വൈറലായി ദുൽഖറിന്റെ വാക്കുകൾ

താരജാഡയില്ലാത്ത കുശുമ്പില്ലാത്ത താരപുത്രനാണ് ദുൽഖറെന്ന് സോഷ്യൽ മീ‍ഡിയ

ദുൽഖറിന്റെ കന്നി തെലുങ്ക് ചിത്രമാണ് മഹാനടി. ചിത്രത്തിനും ദുൽഖറിനും വാനോളം പ്രശംസയാണ് ലഭിക്കുന്നത്. രാജമൌലി അടക്കമുള്ളവർ ദുൽഖറിനെ പുകഴ്ത്തി രംഗത്തെത്തിയിരുന്നു. സോഷ്യൽ മീഡിയ മുഴുവൻ ദുൽഖറിന്റെ കന്നി തെലുങ്ക് ചിത്രം ഏറ്റെടുത്തിരിക്കുകയാണ്. എന്നാൽ, ദുൽഖർ പ്രശംസിക്കുന്നത് മുഴുവൻ ചിത്രത്തിലെ നായിക കീർത്തി സുരേഷിനെയാണ്. 

കീർത്തിയെ പ്രശംസിക്കുകയും പ്രേക്ഷകര്‍ക്കും അണിയറപ്രവര്‍ത്തകര്‍ക്കും നന്ദിയറിയിച്ചും ദുല്‍ഖര്‍ തന്റെ ഫേസ്ബുക്കിൽ ഒരു കുറിപ്പിട്ടു. ‘സിനിമയുടെ ആദ്യാവസാനം തിളങ്ങിനിന്നത് നീയാണ്. കാരണം നീ പകര്‍ത്തിയത് സാവിത്രിയുടെ ജീവിതമാണ്. സാവിത്രിയുടെ ജീവിതത്തിലെ ഓരോ ഘട്ടവും വളരെ തന്മയത്വത്തോടെ നീ അവതരിപ്പിച്ചു. പ്രേക്ഷകര്‍ നിനക്കൊപ്പം കരയുകയും ചിരിക്കുകയും ചെയ്തു.‘ - എന്നാണ് കീർത്തിയെ കുറിച്ച് ദുൽഖർ പറയുന്നത്. 

തെന്നിന്ത്യന്‍ സൂപ്പര്‍നായികയായിരുന്ന സാവിത്രിയുടെയും ജമിനി ഗണേശന്റെയും ജീവിതം പറയുന്ന ചിത്രമാണ് മഹാനടി. ഇതില്‍ ജമിനി ഗണേശന്റെ വേഷമാണ് ദുല്‍ഖര്‍ അവതരിപ്പിക്കുന്നത്. സിനിമ പുറത്തിറങ്ങിയ ശേഷം ദുല്‍ഖറിന് ലഭിച്ചുകൊണ്ടിരിക്കുന്നത് അഭിനന്ദനപ്രവാഹമാണ്.

വൈജയന്തി മൂവീസ് നിര്‍മ്മിച്ചിരിക്കുന്ന ഈ ചിത്രത്തിന്റെ സംവിധായകന്‍ നാഗ് അശ്വിനാണ്.്. സാമന്ത അക്കിനേനി, വിജയ് ദേവരകൊണ്ട, ശാലിനി പാണ്ഡേ, പ്രകാശ് രാജ് എന്നിവരും മഹാനടിയില്‍ പ്രധാനവേഷങ്ങളിലെത്തുന്നു.