മലയാളികളുടെ ലൈംഗിക സദാചാര ബോധങ്ങളെ മുഴുവന്‍ തച്ചുടച്ച സിനിമയാണ് 2012 ല്‍ പുറത്തിറങ്ങിയ ട്രിവാന്‍ഡ്രം ലോഡ്ജ്. വി.കെ.പ്രകാശ് സംവിധാനം ചെയ്ത സിനിമയുടെ തിരക്കഥ നടന്‍ അനൂപ് മേനോന്റേതാണ്. ഹണി റോസ് ആണ് ട്രിവാന്‍ഡ്രം ലോഡ്ജില്‍ നായികയായി അഭിനയിച്ചിരിക്കുന്നത്. ഹണിയുടെ ധ്വനി നമ്പ്യാര്‍ എന്ന കഥാപാത്രം ഏറെ ചര്‍ച്ച ചെയ്യപ്പെട്ടു. ഹണിയുടെ കഥാപാത്രത്തെ ചൊല്ലി വിവാദങ്ങളുമുണ്ടായിരുന്നു. എന്നാല്‍, ഈ ചിത്രത്തില്‍ നായികയാകാന്‍ ഹണി റോസിനെയല്ല ആദ്യം തീരുമാനിച്ചത്.
നടി മേഘ്‌ന രാജിനെയാണ് ഹണി ചെയ്ത ധ്വനി എന്ന കഥാപാത്രത്തിനായി സംവിധായകന്‍ ആദ്യം തീരുമാനിച്ചത്. വി.കെ.പ്രകാശ്-അനൂപ് മേനോന്‍ കൂട്ടുകെട്ടില്‍ 2011 ല്‍ പുറത്തിറങ്ങിയ ബ്യൂട്ടിഫുള്‍ എന്ന സിനിമയില്‍ മേഘ്‌നയായിരുന്നു നായിക. ഈ അടുപ്പമാണ് ട്രിവാന്‍ഡ്രം ലോഡ്ജിലേക്കും പരിഗണിക്കാന്‍ കാരണം. എന്നാല്‍, ട്രിവാന്‍ഡ്രം ലോഡ്ജിലെ കഥാപാത്രത്തോട് മേഘ്‌ന 'നോ' പറയുകയായിരുന്നു. പിന്നീടാണ് ഹണി റോസിനെ നായികയാക്കാന്‍ സംവിധായകന്‍ തീരുമാനിച്ചത്.
ഹണി റോസിന് പുറമേ ജയസൂര്യ, അനൂപ് മേനോന്‍, ഭാവന, പി.ബാലചന്ദ്രന്‍, സൈജു കുറുപ്പ് എന്നിവരും ട്രിവാന്‍ഡ്രം ലോഡ്ജില്‍ അഭിനയിച്ചിട്ടുണ്ട്.
