നാലാം ആഴ്ചയിലും നിറഞ്ഞ സദസ്സില്‍ കല്‍ക്കി; കേരളത്തില്‍ പ്രദര്‍ശനം തുടരുന്നത് ഇരുന്നൂറോളം തിയേറ്ററുകളില്‍

നാലാം ആഴ്ചയിലും നിറഞ്ഞ സദസ്സില്‍ കല്‍ക്കി. കേരളത്തില്‍ 200 ഓളം തിയേറ്ററുകളില്‍ നിറഞ്ഞ സദസില്‍ പ്രദര്‍ശനം തുടരുകയാണ്. ആയിരം കോടിക്ക് മുകളില്‍ ഇതുവരെ ബോക്‌സ് ഓഫീസ് കളക്ഷന്‍ കല്‍ക്കി നേടിയിട്ടുണ്ട്. നാഗ് അശ്വന്റെ സംവിധാനത്തില്‍ പ്രഭാസ് നായകനായി എത്തിയ ചിത്രം 2024 ജൂണ്‍ 27നാണ് തിയേറ്ററുകളില്‍ എത്തിയത്. ബാഹുബലിയുടെ രണ്ടാം ഭാഗത്തിനു ശേഷം കേരളത്തില്‍ ഏറ്റവും കൂടുതല്‍ ബോക്‌സ് ഓഫീസ് കളക്ഷന്‍ നേടുന്ന തെലുങ്ക് ചിത്രം എന്ന പദവി സ്വന്തമാക്കിയിരിക്കുകയാണ് കല്‍ക്കി. 

വെറും 15 ദിവസം കൊണ്ടാണ് ചിത്രം ഇത് സ്വന്തമാക്കിയത്. ഇന്ത്യന്‍ മിത്തോളജിയും സയന്‍സ് ഫിക്ഷനും ഭാവിയിലെ ലോകവും ഉള്‍ക്കൊള്ളിച്ച് നിര്‍മ്മിച്ച സിനിമയ്ക്ക് വലിയ പ്രേക്ഷക പിന്തുണയാണ് ലഭിച്ചത്. മെഗാസ്റ്റാര്‍ അമിതാഭ് ബച്ചന്‍, ഉലകനായകന്‍ കമല്‍ഹാസന്‍, ദിഷാ പട്ടാനി, വിജയ് ദേവരകൊണ്ട, ദുല്‍ഖര്‍ സല്‍മാന്‍ തുടങ്ങി വമ്പന്‍ താരനിരകളാണ് ചിത്രത്തിന്റെ ഭാഗമായിട്ടുള്ളത്.