നടന്‍, സംവിധായകന്‍, നിര്‍മാതാവ്, തിരക്കഥാകൃത്ത് എന്നീ നിലകളിലെല്ലാം അറിയപ്പെടുന്ന കലാകാരനാണ് ലാല്‍. സിനിമയോട് വളരെ അടുത്ത ബന്ധമാണ് ലാലിന്റെ വീട്ടിലെ അംഗങ്ങള്‍ക്കുള്ളത്. മലയാളത്തിലെ ഒരു സൂപ്പര്‍ഹിറ്റ് സിനിമയിലെ സൂപ്പര്‍ഹിറ്റ് പാട്ട് പോലും ലാലിന്റെ കുടുംബത്തില്‍ നിന്ന് എടുത്തിട്ടുള്ളതാണ്.
2002 ല്‍ പുറത്തിറങ്ങിയ സൂപ്പര്‍ഹിറ്റ് ചിത്രമാണ് കല്ല്യാണരാമന്‍. ദിലീപ്, നവ്യ നായര്‍, കുഞ്ചാക്കോ ബോബന്‍, ലാല്‍, ഇന്നസെന്റ്, സലിം കുമാര്‍ തുടങ്ങി ഒട്ടേറെ പ്രമുഖ താരങ്ങള്‍ അഭിനയിച്ച സിനിമയാണ് കല്ല്യാണരാമന്‍. ബെന്നി പി.നായരമ്പലത്തിന്റെ തിരക്കഥയില്‍ ഷാഫിയാണ് കല്ല്യാണരാമന്‍ സംവിധാനം ചെയ്തത്. ലാല്‍ ക്രിയേഷന്‍സിന്റെ ബാനറില്‍ നടന്‍ ലാല്‍ തന്നെയാണ് കല്ല്യാണരാമന്‍ നിര്‍മ്മിച്ചത്. ഈ സിനിമയിലെ 'തലേംകുത്തി' എന്ന പാട്ടാണ് ലാലിന്റെ വീട്ടില്‍ നിന്ന് കടം കൊണ്ടത്. കുടുംബക്കാര്‍ എല്ലാവരും കൂടി എന്തെങ്കിലും ആഘോഷ പരിപാടികള്‍ ഉണ്ടാകുമ്പോള്‍ ലാലിന്റെ വീട്ടിലെ എല്ലാവരും കൂടി പാടുന്ന പാട്ടാണ് ഇത്. രസകരമായ പാട്ടാണിതെന്നും ഈ പാട്ട് സിനിമയില്‍ ഉള്‍പ്പെടുത്തിയാല്‍ നന്നാകുമെന്നും സംവിധായകന്‍ ഷാഫി തീരുമാനിക്കുകയായിരുന്നു.