ഇത് മൗത്ത് പബ്ലിസിറ്റിയുടെ വിജയം; ബോക്‌സ്ഓഫീസില്‍ അത്ഭുതം കാട്ടി കിഷ്‌കിന്ധാ കാണ്ഡം, ടൊവിനോ ചിത്രത്തിനു വെല്ലുവിളി !

റിലീസിനു ശേഷമുള്ള ശനിയാഴ്ച മുതലാണ് ബോക്‌സ്ഓഫീസ് കളക്ഷന്‍ ഒരു കോടിക്ക് മുകളില്‍ എത്തിയത്

മൗത്ത് പബ്ലിസിറ്റിയിലൂടെ ഓണം വിന്നറായി ആസിഫ് അലി ചിത്രം കിഷ്‌കിന്ധാ കാണ്ഡം. റിലീസിനു ശേഷമുള്ള ആദ്യ തിങ്കള്‍, ചൊവ്വ ദിവസങ്ങളില്‍ ഞെട്ടിക്കുന്ന ബോക്‌സ്ഓഫീസ് കളക്ഷനാണ് ചിത്രത്തിനു ലഭിച്ചത്. സെപ്റ്റംബര്‍ 12 വ്യാഴാഴ്ച തിയറ്ററുകളിലെത്തിയ ചിത്രത്തിനു ആദ്യദിനം 47 ലക്ഷമാണ് കളക്ട് ചെയ്യാന്‍ സാധിച്ചത്. റിലീസ് ചെയ്തു അഞ്ചാം ദിനമായ തിങ്കളാഴ്ചയിലേക്ക് എത്തുമ്പോള്‍ കളക്ഷന്‍ രണ്ടര കോടിക്ക് മുകളില്‍ ആയി. 

റിലീസിനു ശേഷമുള്ള ശനിയാഴ്ച മുതലാണ് ബോക്‌സ്ഓഫീസ് കളക്ഷന്‍ ഒരു കോടിക്ക് മുകളില്‍ എത്തിയത്. ഉത്രാട ദിനമായ ശനിയാഴ്ച 1.35 കോടിയാണ് ചിത്രം കളക്ട് ചെയ്തത്. തിരുവോണ ദിനമായ ഞായറാഴ്ച 1.95 കോടി കളക്ഷന്‍ ലഭിച്ചു. തിങ്കളാഴ്ച 2.57 കോടിയും ലഭിച്ചു. റിലീസ് ചെയ്തു ആറാം ദിനമായ ചൊവ്വാഴ്ചയും രണ്ടര കോടിക്ക് അടുത്ത് കളക്ഷന്‍ ലഭിച്ചിട്ടുണ്ട്. ടൊവിനോ ചിത്രം അജയന്റെ രണ്ടാം മോഷണത്തിനു വെല്ലുവിളി ഉയര്‍ത്തിയാണ് കിഷ്‌കിന്ധാ കാണ്ഡത്തിന്റെ കുതിപ്പ്. 

തിരക്കഥ, സംവിധാനം, അഭിനേതാക്കളുടെ പെര്‍ഫോമന്‍സ് എന്നിങ്ങനെ എല്ലാ മേഖലയിലും പ്രേക്ഷകര്‍ക്കു പരിപൂര്‍ണ സംതൃപ്തി നല്‍കുന്ന സിനിമയാണ് കിഷ്‌കിന്ധാ കാണ്ഡം. മൈന്‍ഡ് ത്രില്ലര്‍ എന്നതിനൊപ്പം പ്രേക്ഷകരെ ഹൂക്ക് ചെയ്യുന്ന ഇമോഷണല്‍ ഡ്രാമയും സിനിമയില്‍ നല്ല രീതിയില്‍ വര്‍ക്ക്ഔട്ട് ആയിട്ടുണ്ട്. തിയറ്ററില്‍ നിന്ന് തന്നെ ഈ സിനിമ കാണണമെന്നാണ് വെബ് ദുനിയ മലയാളത്തിന്റെ റിവ്യുവില്‍ പറയുന്നത്.