ധ്രുവം എന്ന സിനിമ ജോഷി പ്ലാന്‍ ചെയ്യുന്ന സമയം. മമ്മൂട്ടി നരസിംഹ മന്നാഡിയാര്‍ എന്ന കഥാപാത്രത്തെ അവതരിപ്പിക്കും. മമ്മൂട്ടിയുടെ അനുജനായി ആര് വേണമെന്ന ചിന്ത വന്നു. വീരസിംഹ മന്നാഡിയാര്‍ എന്ന ആ കഥാപാത്രത്തെ മുകേഷ് അവതരിപ്പിക്കട്ടെ എന്നായിരുന്നു ജോഷിയുടെ തീരുമാനം.
മമ്മൂട്ടിക്കും അത് സമ്മതമായിരുന്നു. കാരണം ജോഷിച്ചിത്രങ്ങളില്‍ മമ്മൂട്ടി - മുകേഷ് ഒരു നല്ല കോമ്പിനേഷനാണ്. സംഘം, ശ്യാമ, ദിനരാത്രങ്ങള്‍, നായര്‍സാബ്, മഹായാനം തുടങ്ങിയ സിനിമകളില്‍ ഈ കൂട്ടുകെട്ട് വലിയ രീതിയില്‍ സ്വീകരിക്കപ്പെട്ടിട്ടുണ്ട്.
അതുകൊണ്ടുതന്നെ മുകേഷ് വീരസിംഹനാവട്ടെ എന്ന് ജോഷിയും മമ്മൂട്ടിയും തീരുമാനിച്ചു. എന്നാല്‍ ധ്രുവം തുടങ്ങുന്ന അതേ ഡേറ്റില്‍ മുകേഷിന് ഒന്നിലധികം ചിത്രങ്ങളുടെ ജോലിയുണ്ടായിരുന്നു. മാത്രമല്ല, ആ സമയത്ത് ഒരേസമയം പത്തോളം സിനിമകളുടെ ജോലിയിലായിരുന്നു മുകേഷ്. എങ്ങനെ അഡ്ജസ്റ്റ് ചെയ്താലും ധ്രുവത്തില്‍ ജോയിന്‍ ചെയ്യാന്‍ പറ്റില്ല. അങ്ങനെ മനസില്ലാ മനസോടെ ധ്രുവം വേണ്ടെന്നുവയ്ക്കാന്‍ മുകേഷ് തീരുമാനിച്ചു.
മുകേഷിന് പറ്റില്ലെങ്കില്‍ ആ കഥാപാത്രത്തെ റഹ്‌മാന് നല്‍കാമെന്ന് ജോഷി ആലോചിച്ചു. പിന്നീട് സുരേഷ്ഗോപിയെയും ആ കഥാപാത്രത്തിനായി നോക്കി. എന്നാല്‍ ഒടുവില്‍ ജയറാം ആ കഥാപാത്രത്തെ ചെയ്യട്ടെ എന്ന് നിശ്ചയിച്ചു. അങ്ങനെ ജയറാമാണ് വീരസിംഹ മന്നാഡിയാരായി ധ്രുവത്തില്‍ തിളങ്ങിയത്. സുരേഷ് ഗോപിക്ക് ജോസ് നരിമാന്‍ എന്നൊരു കഥാപാത്രത്തെയും നല്‍കി.
മുകേഷ് ധ്രുവത്തില്‍ നിന്ന് പിന്‍‌മാറിയെങ്കിലും തൊട്ടടുത്ത വര്‍ഷം തന്നെ ജോഷിയുടെ ‘സൈന്യ’ത്തില്‍ മമ്മൂട്ടിക്കൊപ്പം അദ്ദേഹം അഭിനയിച്ചു.
