ഭ്രമയുഗത്തിന്റെ അവസാനഭാഗത്ത് മമ്മൂട്ടി അവതരിപ്പിച്ച കൊടുമണ്‍ പോറ്റിയുടെ കഥാപാത്രത്തിന്റെ ഉള്ളില്‍നിന്ന് പുറത്തു ചാടുന്ന ചാത്തന്‍ എന്ന രൂപം അറപ്പ് ഉളവാക്കുന്നതും ആയിരുന്നു. എന്നാല്‍ ഈ കഥാപാത്രം അവതരിപ്പിച്ചത് ആരാണെന്ന് അറിയാമോ ? അത് ഗ്രാഫിക്‌സ് ആയിരുന്നില്ല. ഒരു എട്ടാം ക്ലാസുകാരനായിരുന്നു ചാത്തനായി വേഷമിട്ടത്. ആകാശ് എന്നാണ് പേര്. ആകാശ് തന്നെ ഈ സിനിമയില്‍ എത്തിയതിനെക്കുറിച്ച് പറയുകയാണ്.
ഞാനൊരു ഡാന്‍സ് സ്‌കൂളില്‍ പഠിക്കുകയാണ്. എന്റെ മാസ്റ്റര്‍ കാരണമാണ് ഈ സിനിമയില്‍ എനിക്ക് അവസരം ലഭിക്കുന്നത്. സിനിമയിലെ ആ സീനിനെ പറ്റി കൂടുതല്‍ ഒന്നും എന്നോട് പറഞ്ഞിരുന്നില്ല. കത്തിയ ഒരു ദേഹത്തിന്റെ ഉള്ളില്‍നിന്ന് വരുന്നതാണെന്ന് മാത്രം പറഞ്ഞിരുന്നു. കത്തിയ ദേഹം മമ്മൂട്ടിയുടെ ആണെന്നും പറഞ്ഞിരുന്നു.അപ്പോള്‍ ഞാന്‍ ഒരുപാട് എക്‌സൈറ്റഡ് ആയിരുന്നു. ആ സീന്‍ ചെയ്യുമ്പോള്‍ കണ്ണില്‍ ലെന്‍സ് വെച്ചിരുന്നു. മേക്കപ്പ് തൊട്ടുനോക്കുമ്പോള്‍ വളരെ സോഫ്റ്റ് ആയി നില്‍ക്കുന്നതായിരുന്നു. കാണുന്നത് പോലെയുള്ള ഒരു അറപ്പ് തോന്നിയിരുന്നില്ല.
എന്റെ ഷൂട്ടിംഗ് മൂന്ന് ദിവസമായിരുന്നു. മേക്കപ്പ് വെളുപ്പിന് അഞ്ചുമണിക്കാണ് തുടങ്ങിയത്. 12 മണിയോടെയാണ് അത് കഴിയുന്നത്. എറണാകുളത്ത് ഒരു സ്റ്റുഡിയോയിലാണ് അന്ന് സെറ്റ്. ആദ്യമായാണ് ഞാന്‍ സിനിമയില്‍ അഭിനയിക്കുന്നത്. അവര്‍ കരാറില്‍ ഈ സിനിമയെ കുറിച്ച് ആരോടും പറയരുതെന്ന് പറഞ്ഞിരുന്നു. അങ്ങനെ പറഞ്ഞാല്‍ ആളുകള്‍ക്ക് പേടി പോകുമെന്നാണ് പറഞ്ഞതെന്ന് ആകാശം പറഞ്ഞു.
