'മഹേഷേ, എന്ന പണ്ണപ്പോരേ..!' മമ്മൂട്ടിയുടെ നൂറ് ദിവസങ്ങള്‍; മോഹന്‍ലാലിന്റേത് വെറ്റും കാമിയോ റോള്‍ അല്ല!

മമ്മൂട്ടി കേന്ദ്ര കഥാപാത്രത്തെ അവതരിപ്പിക്കുന്ന ചിത്രത്തില്‍ മോഹന്‍ലാലിന്റേത് എക്സ്റ്റന്റഡ് കാമിയോ റോള്‍ ആണ്

നീണ്ട ഇടവേളയ്ക്കു ശേഷം മമ്മൂട്ടിയും മോഹന്‍ലാലും ഒന്നിക്കുന്ന സിനിമയുടെ ചിത്രീകരണം ഉടന്‍ ആരംഭിക്കും. ഡിസംബറില്‍ ഷൂട്ടിങ് ആരംഭിക്കാന്‍ തീരുമാനിച്ച സിനിമ മോഹന്‍ലാലിന്റെ മറ്റു ചില തിരക്കുകളെ തുടര്‍ന്ന് അല്‍പ്പം നേരത്തെയാക്കി. ഈ ആഴ്ച തന്നെ ചിത്രീകരണം ആരംഭിക്കുമെന്നാണ് വിവരം. മഹേഷ് നാരായണന്‍ ആണ് ഈ ചിത്രം സംവിധാനം ചെയ്യുന്നത്. പ്രേക്ഷകര്‍ കാത്തിരിക്കുന്ന ഔദ്യോഗിക പ്രഖ്യാപനം ഉടനുണ്ടാകും. 

മമ്മൂട്ടി കേന്ദ്ര കഥാപാത്രത്തെ അവതരിപ്പിക്കുന്ന ചിത്രത്തില്‍ മോഹന്‍ലാലിന്റേത് എക്സ്റ്റന്റഡ് കാമിയോ റോള്‍ ആണ്. ക്ലൈമാക്‌സില്‍ മമ്മൂട്ടിയും മോഹന്‍ലാലും ഒന്നിച്ചുള്ള രംഗങ്ങള്‍ ഉണ്ടാകുമെന്നാണ് വിവരം. മമ്മൂട്ടി-മോഹന്‍ലാല്‍ കോംബിനേഷന്‍ സീനുകളുടെ ചിത്രീകരണം ശ്രീലങ്കയില്‍ നടക്കും. മഹേഷ് നാരായണന്‍ ചിത്രം പൂര്‍ത്തിയായിട്ടേ മോഹന്‍ലാല്‍ സത്യന്‍ അന്തിക്കാട് ചിത്രത്തില്‍ ജോയിന്‍ ചെയ്യൂ. മമ്മൂട്ടിയേയും മോഹന്‍ലാലിനേയും കൂടാതെ ഫഹദ് ഫാസിലും കുഞ്ചാക്കോ ബോബനും ഈ പ്രൊജക്ടിന്റെ ഭാഗമാകും. 

മമ്മൂട്ടിയുടെ നൂറിലേറെ ദിവസങ്ങളാണ് മഹേഷ് നാരായണന്‍ ഈ സിനിമയ്ക്കായി വാങ്ങിയിരിക്കുന്നത്. മമ്മൂട്ടി കഴിഞ്ഞാല്‍ കുഞ്ചാക്കോ ബോബനും ഫഹദ് ഫാസിലിനും ആയിരിക്കും സുപ്രധാന റോളുകള്‍. ഇവരില്‍ ഒരാളായിരിക്കും വില്ലന്‍ വേഷം ചെയ്യുകയെന്നും റിപ്പോര്‍ട്ടുകളുണ്ട്. വളരെ ആശ്ചര്യപ്പെടുത്തുന്ന ഒരു പ്രൊജക്ട് ആണ് മമ്മൂട്ടി-മോഹന്‍ലാല്‍ സിനിമയെന്ന് ഈയടുത്ത് ഒരു അഭിമുഖത്തില്‍ കുഞ്ചാക്കോ ബോബന്‍ പറഞ്ഞിരുന്നു. മലയാള സിനിമ ഇതുവരെ കണ്ടിട്ടില്ലാത്ത തരത്തിലുള്ള കഥയും കഥാപശ്ചാത്തലവും എക്‌സ്പീരിയന്‍സും ആയിരിക്കും ഈ സിനിമയെന്നും കുഞ്ചാക്കോ ബോബന്‍ പറഞ്ഞു.