മമ്മൂട്ടി ആരാധകർ ഏറെ ആകാംക്ഷയോടെ കാത്തിരിക്കുന്ന ചിത്രമാണ് മധുരരാജ. പ്രേക്ഷകർ ഇരുകൈയും നീട്ടി സ്വീകരിച്ച ചിത്രമായിരുന്നു പോക്കിരിരാജ. അതിന്റെ രണ്ടാം ഭാഗമാണ് മധുരരാജ. ചിത്രത്തിന്റെ ആദ്യ ഷെഡ്യൂൾ ഷൂട്ടിങ് എറണാകുളത്ത് അവസാനിച്ചിരുന്നു.
രണ്ടാമത്തെ ഷെഡ്യൂൾ ചിത്രീകരണത്തിന്റെ തിരക്കിലേക്ക് കടക്കുകയാണ് മമ്മൂട്ടിയും സംവിധായകൻ വൈശാഖും. ഇതിനായി മമ്മൂട്ടിയെ കണ്ട് സംസാരിക്കാനും സിനിമയുടെ കൂടുതൽ കാര്യങ്ങൾ ചർച്ച ചെയ്യാനും വൈശാഖ് മമ്മൂട്ടിയുടെ തെലുങ്ക് ചിത്രമായ ‘യാത്ര’യുടെ സെറ്റിലെത്തി.
എന്നാൽ, 8000ത്തിലധികം ആളുകൾക്ക് നടുവിലുള്ള മമ്മൂക്കയെ ആണ് വൈശാഖ് കണ്ടത്. ഇതിന്റെ ഫോട്ടോയും സംവിധായകൻ സോഷ്യൽ മീഡിയയിൽ പങ്കു വെച്ചിട്ടുണ്ട്. ഏതായാലും ഇരുവരും ചർച്ച നടത്തുകയും അടുത്ത ദിവസങ്ങൾക്കുള്ളിൽ തന്നെ ചിത്രത്തിന്റെ അടുത്ത ഷെഡ്യൂൾ ഷൂട്ടിംഗ് ആരംഭിക്കുമെന്നും സൂചനയുണ്ട്.
മമ്മൂട്ടിയുടെ കരിയറിലെ ഏറ്റവും വലിയ ചിത്രമാണ് മധുരരാജ. പുലിമുരുകന്റെ വൻ വിജയത്തിന് ശേഷം വൈശാഖ്-ഉദയകൃഷ്ണ-പീറ്റർ ഹെയ്‌ൻ ടീം മധുരരാജയിലൂടെ വീണ്ടും ഒന്നിക്കുന്നുവെന്ന പ്രത്യേകതയും ഈ ചിത്രത്തിനുണ്ട്. 2010 ൽ തിയറ്ററുകളെ ഇളക്കി മറിച്ച പോക്കിരി രാജ രണ്ടാം വരവിനൊരുമ്പോൾ ആരാധകർ ആവേശത്തിലാകുമെന്നു തീർച്ച.