താരസംഘടനയായ അമ്മയുടെ ജനറല്‍ ബോഡി യോഗം ഞായറാഴ്ച കൊച്ചില്‍ ആഡംബരമായാണ് നടന്നത്. മലയാളത്തിലെ സൂപ്പര്‍താരങ്ങള്‍ അടക്കം 300-ലേറെ അഭിനേതാക്കള്‍ ജനറല്‍ ബോഡി യോഗത്തില്‍ പങ്കെടുത്തിരുന്നു. ജനറല്‍ ബോഡി യോഗത്തിനെത്തിയ താരങ്ങള്‍ തമ്മിലുള്ള സൗഹൃദ നിമിഷങ്ങളുടെ വീഡിയോയാണ് ഇപ്പോള്‍ സോഷ്യല്‍ മീഡിയയില്‍ പ്രചരിക്കുന്നത്.
അമ്മയുടെ എക്‌സിക്യൂട്ടീവ് കമ്മിറ്റിയിലേക്കുള്ള വോട്ടെടുപ്പും ജനറല്‍ ബോഡിയില്‍ നടന്നിരുന്നു. സ്ഥാനാര്‍ഥികളായ താരങ്ങള്‍ സഹതാരങ്ങള്‍ക്ക് അടുത്തെത്തി വോട്ട് ചോദിക്കുന്നത് കാണാം. മെഗാസ്റ്റാര്‍ മമ്മൂട്ടിയോട് വൈസ് പ്രസിഡന്റ് സ്ഥാനാര്‍ഥി ശ്വേതാ മേനോന്‍ വോട്ട് ചോദിക്കുന്ന രസകരമായ വീഡിയോയാണ് ഇപ്പോള്‍ വൈറലായിരിക്കുന്നത്.
മമ്മൂക്ക, എനിക്ക് വോട്ട് ചെയ്യണം എന്ന് പറഞ്ഞു തന്റെ അടുത്തെത്തിയ ശ്വേതയോട് ഇങ്ങനെ ചുമ്മാ വോട്ട് ചോദിച്ചാല്‍ പോരാ എന്നും വോട്ടിന് പൈസ വേണമെന്നും മമ്മൂട്ടി പറയുന്നുണ്ട്. കയ്യില്‍ എത്ര പൈസയുണ്ടെന്ന് ശ്വേതയോട് തമാശരൂപേണ ചോദിക്കുന്ന മമ്മൂട്ടിയേയും വീഡിയോയില്‍ കാണാം. മറ്റൊരു സ്ഥാനാര്‍ഥിയായ ടിനി ടോമിനോട് എത്ര പൈസ കൈയില്‍ ഉണ്ടെന്ന് മമ്മൂട്ടി ചോദിക്കുമ്പോള്‍ സ്‌നേഹം തരാം എന്നാണ് ടിനി മമ്മൂട്ടിക്ക് നല്‍കുന്ന മറുപടി. ഇത് കേട്ട് തൊട്ടടുത്ത് നില്‍ക്കുകയായിരുന്ന മനോജ് കെ.ജയന്‍ ടിനിയെ ചൂണ്ടി ഇവനെ സൂക്ഷിക്കണം എന്ന് മമ്മൂട്ടിയോട് പറയുന്നുണ്ട്.
