മോഹന്‍ലാലിനൊപ്പം സന്തോഷ് ശിവന്‍, 'ബറോസ്' ഒരുങ്ങുന്നു

'ബറോസ്' ഒരുങ്ങുന്നു. പുതിയ വിശേഷങ്ങളുമായി പ്രശസ്ത ഛായാഗ്രഹകന്‍ സന്തോഷ് ശിവന്‍. സെറ്റുകളില്‍ നിന്ന് മോഹന്‍ലാലിനൊപ്പം എടുത്ത ഒരു ഫോട്ടോ അദ്ദേഹം പങ്കിട്ടു. മോഹന്‍ലാല്‍ ചിത്രത്തിന് സന്തോഷ് ശിവന്‍ ക്യാമറ കൈകാര്യം ചെയ്യുമ്പോള്‍ പുതിയ പ്രതീക്ഷകളാണ് ഓരോ ആരാധകര്‍ക്കും. ഇതിനുമുമ്പ് 'യോധ', 'നിര്‍ണ്ണയം', 'കലാപാനി', 'ഇരുവര്‍' തുടങ്ങിയ ചിത്രങ്ങളില്‍ ഇരുവരും ഒരുമിച്ച് പ്രവര്‍ത്തിച്ചിട്ടുണ്ട്. നേരത്തെ 'ബറോസ്' പ്രീ-പ്രൊഡക്ഷന്‍ ജോലികള്‍ നടക്കുമ്പോള്‍ സന്തോഷ് ശിവനും ടീമിനൊപ്പം ചേര്‍ന്നിരുന്നു.

'ബറോസ്' പൂജ ചടങ്ങുകള്‍ മലയാള സിനിമ ലോകം ആഘോഷമാക്കിയിരുന്നു. മമ്മൂട്ടി, പൃഥ്വിരാജ്, ദിലീപ്, സംവിധായകരായ പ്രിയദര്‍ശന്‍, ഫാസില്‍, സിബി മലയില്‍, സത്യന്‍ അന്തിക്കാട് തുടങ്ങിയ പ്രമുഖരെല്ലാം ചടങ്ങില്‍ സന്നിഹിതരായിരുന്നു. പൂര്‍ണ്ണമായും 3 ഡി ഫോര്‍മാറ്റില്‍ ചിത്രീകരിക്കാന്‍ ഉദ്ദേശിക്കുന്ന ചിത്രമാണ് 'ബറോസ്'. ഇന്ത്യയിലെ ആദ്യത്തെ 3 ഡി ചിത്രമായ 'മൈ ഡിയര്‍ കുട്ടിചാത്തന്‍' നിര്‍മ്മിച്ച ജിജോ പുന്നൂസ് ആണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. 'ബാറോസ്-ദി ഗാര്‍ഡിയന്‍ ഓഫ് ഡി ഗാമാസ് ട്രെഷര്‍' എന്നാണ് സിനിമയുടെ മുഴുവന്‍ പേര്.ഒരു കുട്ടിക്കും ഭൂതത്തിനുമിടയിലുള്ള നിഗൂഢതയാണ് ബാറോസിന്റെ പ്രമേയം.