'എന്റെ ചിന്നത്തമ്പി, ആ സിനിമ നിങ്ങൾ കാണണം': ദുൽഖർ സൽമാന്റെ ചിത്രത്തിന് ബൂസ്റ്റ് നൽകി സൂര്യ

മലയാളികളുമായി ഏറ്റവും അടുപ്പമുള്ള നടന്മാരിൽ ഒരാളാണ് സൂര്യ. വിജയ്ക്ക് മലയാളികൾ നൽകുന്ന സ്നേഹം ഒരു പകുതിയായി മലയാളികൾ സൂര്യയ്ക്കും നൽകാറുണ്ട്. തന്റെ പുതിയ ചിത്രത്തിന്റെ തിരക്കിലാണ് സൂര്യ. കങ്കുവ എന്ന തന്റെ ഏറ്റവും പുതിയ ചിത്രത്തിന്റെ പ്രൊമോഷനോടനുബന്ധിച്ച് സൂര്യ കഴിഞ്ഞ ദിവസം കൊച്ചിയിൽ എത്തിയിരുന്നു. ഇവിടെ വെച്ച് അദ്ദേഹം ദുൽഖർ സൽമാന്റെ ലക്കി ഭാസ്കറിനെ കുറിച്ച് പറഞ്ഞ വാക്കുകൾ സോഷ്യൽ മീഡിയയിൽ വൈറലാകുന്നു. 

ദുൽഖർ സൽമാൻ്റെ ‘ലക്കി ഭാസ്‌കർ’ എന്ന ചിത്രത്തിൻ്റെ വിജയത്തെ അദ്ദേഹം എടുത്തുകാട്ടി. അത് തീർച്ചയായും കാണേണ്ട ഒന്നായി ശുപാർശ ചെയ്തു. 'എന്റെ ചിന്നത്തമ്പി ദുല്‍ഖറിന്റെ ചിത്രം ലക്കി ഭാസ്‌കറും ഗംഭീരമായി പോകുന്നുവെന്നറിഞ്ഞു. സിനിമ കാണാത്തവരുണ്ടെങ്കില്‍ പോയി കാണണം’ എന്നായിരുന്നു സൂര്യ പറഞ്ഞത്. 

“മലയാള സിനിമ ഇന്ത്യൻ സിനിമയ്ക്ക് തന്നെ മാതൃകയാണ്” എന്ന അദ്ദേഹത്തിൻ്റെ പ്രസ്താവന മലയാള ചലച്ചിത്ര വ്യവസായത്തിൽ നിർമ്മിക്കപ്പെട്ട സിനിമകളുടെ സ്വാധീനവും ഗുണനിലവാരവും അടിവരയിടുന്നു. ഇന്ത്യൻ സിനിമാ വ്യവസായത്തിന് മുഴുവൻ മാതൃകാപരമായ ഇൻഡസ്ട്രി ആണ് മലയാളമെന്നും അദ്ദേഹം പുകഴ്ത്തി.