ഡിവോഴ്‌സിന് ശേഷവും വീട്ടുകാര്‍ക്ക് മനോജ് കെ.ജയനുമായി അടുത്ത ബന്ധം; ഉര്‍വശിക്ക് അത് സഹിച്ചില്ല, അന്ന് കല്‍പ്പനയുമായി പിണങ്ങി !

മലയാളികള്‍ക്ക് ഏറെ പ്രിയപ്പെട്ട താരകുടുംബമാണ് ഉര്‍വശിയുടേത്. ഉര്‍വശിയുടെ മൂത്ത സഹോദരി കലാരഞ്ജിനിയും രണ്ടാമത്തെ സഹോദരി കല്‍പ്പനയും മലയാള സിനിമയിലെ സജീവ സാന്നിധ്യങ്ങളായിരുന്നു. മൂവരുടേയും അനിയന്‍ പ്രിന്‍സും സിനിമയില്‍ അഭിനയിച്ചിട്ടുണ്ട്.

കലാരഞ്ജിനിക്കും കല്‍പ്പനയ്ക്കും പ്രിയപ്പെട്ട അനിയത്തിയായിരുന്നു ഉര്‍വശി. ഇളയ പെണ്‍മകള്‍ ആയിരുന്നതിനാല്‍ അല്‍പ്പം വാശിയും പക്വത കുറവും ഉര്‍വശിക്കുണ്ടായിരുന്നെന്നാണ് കല്‍പ്പന മുന്‍പ് പല അഭിമുഖങ്ങളിലും പറഞ്ഞിട്ടുള്ളത്. നടന്‍ മനോജ് കെ.ജയനെയാണ് ഉര്‍വശി ആദ്യം വിവാഹം കഴിച്ചത്. ഈ ബന്ധം പിന്നീട് പിരിഞ്ഞു. ഇരുവരും വേറെ വിവാഹം കഴിച്ചു. ഉര്‍വശിക്കും മനോജിനും കുഞ്ഞാറ്റ എന്ന മകളുണ്ട്. മകള്‍ മനോജ് കെ.ജയനൊപ്പമാണ്.

ഉര്‍വശിയും മനോജ് കെ.ജയനും ബന്ധം പിരിഞ്ഞതില്‍ താന്‍ എതിരായിരുന്നെന്ന് കല്‍പ്പന പഴയൊരു അഭിമുഖത്തില്‍ പറഞ്ഞിട്ടുണ്ട്. ജീവിതത്തില്‍ എല്ലാ തീരുമാനങ്ങളിലും ഉര്‍വശിക്കൊപ്പം കല്‍പ്പനയുണ്ടായിരുന്നു. എന്നാല്‍ മനോജ് കെ.ജയനുമായുള്ള ബന്ധം പിരിയാനുള്ള തീരുമാനം ഉര്‍വശി ഒറ്റയ്ക്കാണ് എടുത്തത്. ഇതില്‍ കല്‍പ്പനയ്ക്ക് തന്നോട് ചെറിയ വിഷമവും പിണക്കവും ഉണ്ടായിരുന്നെന്നാണ് ഉര്‍വശി പില്‍ക്കാലത്ത് വെളിപ്പെടുത്തിയിട്ടുള്ളത്.

ഉര്‍വശിയുമായുള്ള ബന്ധം പിരിഞ്ഞ ശേഷം മനോജ് കെ.ജയനുമായി ഉര്‍വശിയുടെ കുടുംബം അടുത്തബന്ധം പുലര്‍ത്തിയിരുന്നു. തങ്ങള്‍ക്ക് മനോജ് കെ.ജയന്‍ ഇപ്പോഴും സ്വന്തം സഹോദരനെ പോലെയാണെന്ന് കല്‍പ്പന പറഞ്ഞിരുന്നു. എന്നാല്‍ ഇത് ഉര്‍വശിക്ക് അത്ര ഇഷ്ടപ്പെട്ടില്ല. വീട്ടുകാര്‍ തന്നെ ഒറ്റപ്പെടുത്തിയെന്ന പരിഭവമായിരുന്നു അപ്പോഴെല്ലാം ഉര്‍വശിക്ക്. എന്തുകൊണ്ടാണ് ഉര്‍വശിയെ അങ്ങനെ ഒറ്റപ്പെടുത്തി മനോജ് കെ.ജയനുമായുള്ള സൗഹൃദം തുടര്‍ന്നത് എന്ന ചോദ്യത്തിനു കല്‍പ്പന ഒരു അഭിമുഖത്തില്‍ വ്യക്തമായ മറുപടി നല്‍കിയിരുന്നു.

ഉര്‍വശിയുടേയും മനോജ് കെ.ജയന്റേയും മകള്‍ കുഞ്ഞാറ്റ തങ്ങള്‍ക്കെല്ലാം വളരെ പ്രിയപ്പെട്ട കുഞ്ഞാണ്. കുഞ്ഞാറ്റ ഇപ്പോള്‍ മനോജിനൊപ്പമാണ്. കുഞ്ഞാറ്റയുമായുള്ള ബന്ധം ഉപേക്ഷിക്കാന്‍ തങ്ങള്‍ക്ക് സാധിക്കില്ല. കുഞ്ഞാറ്റയെ കാണാനും സംസാരിക്കാനും മനോജിന്റെ അടുത്ത് പോകണം. അതുകൊണ്ട് കൂടിയാണ് വിവാഹമോചന ശേഷവും ആ ബന്ധം തുടര്‍ന്നതെന്നായിരുന്നു കല്‍പ്പനയുടെ നിലപാട്. മനോജ് കെ.ജയനുമായുള്ള ബന്ധം പിരിഞ്ഞതിന്റെ പേരില്‍ ഉര്‍വശിയും കല്‍പ്പനയും ഏറെ നാള്‍ ചെറിയ പിണക്കത്തിലും പരിഭവത്തിലുമായിരുന്നു.