രണ്ട് മില്യണ്‍ കാഴ്ചക്കാരുമായി 'കുറുപ്പ്' ടീസര്‍, നന്ദി അറിയിച്ച് അണിയറ പ്രവര്‍ത്തകര്‍ !

ദുല്‍ഖര്‍ സല്‍മാന്റെ 'കുറുപ്പ്' ടീസര്‍ യൂട്യൂബില്‍ തരംഗമാകുകയാണ്. പുറത്തുവന്ന് ആദ്യ മണിക്കൂറുകളില്‍ തന്നെ രണ്ട് മില്യണ്‍ കാഴ്ചക്കാരെന്ന നേട്ടവുമായി ടീസര്‍ കൂടുതല്‍ പ്രേക്ഷകരിലേയ്ക്ക് എത്തുകയാണ്. സിനിമയെക്കുറിച്ചുള്ള ആദ്യ സൂചന കൂടിയായിരുന്നു ഇത്. സിനിമ എങ്ങനെയായിരിക്കുമെന്ന വ്യക്തമാക്കുന്ന ടീസറിന് മികച്ച പ്രതികരണമാണ് ലഭിച്ചു കൊണ്ടിരിക്കുന്നത്. ഇതിനെല്ലാം നന്ദി അറിയിച്ചുകൊണ്ട് അണിയറപ്രവര്‍ത്തകരും എത്തി. 

കുറുപ്പിന്റെ വേഷം ദുല്‍ഖര്‍ അവതരിപ്പിക്കുമ്പോള്‍, ഇന്ദ്രജിത്ത് സുകുമാരന്‍ പോലീസ് ഉദ്യോഗസ്ഥന്റെ വേഷത്തിലെത്തുന്നു. ടോവിനോ തോമസ്, സണ്ണി വെയ്ന്‍, ഷൈന്‍ ടോം ചാക്കോ, വിജയരാഘവന്‍, ശോഭിത ധൂലിപാല,സുരഭി ലക്ഷ്മി തുടങ്ങി വന്‍ താരനിര തന്നെ ചിത്രത്തില്‍ അണിനിരക്കുന്നു. 

ശ്രീനാഥ് രാജേന്ദ്രന്‍ സംവിധാനം ചെയ്യുന്ന ചിത്രം സുകുമാരക്കുറുപ്പിന്റെ ജീവിതത്തെ ആസ്പദമാക്കിയാണ്.ജിതിന്‍ കെ ജോസ് ആണ് കുറുപ്പ് എന്ന സിനിമയുടെ കഥ എഴുതിയിരിക്കുന്നത്. കെ എസ് അരവിന്ദ്, ഡാനിയല്‍ സയൂജ് നായര്‍ എന്നിവര്‍ സംയുക്തമായാണ് തിരക്കഥ രചിച്ചിരിക്കുന്നത്. എം സ്റ്റാര്‍ എന്റര്‍ടൈന്‍മെന്റിനൊപ്പം ചേര്‍ന്ന് ദുല്‍ഖര്‍ സല്‍മാന്റെ വേഫെയര്‍ ഫിലിംസാണ് ചിത്രം നിര്‍മ്മിക്കുന്നത്.