ബ്രസീലിന് എന്നെ വേണം, ഞാൻ ആവേശഭരിതനാണ്: ആഞ്ചലോട്ടി

റയൽ മാഡ്രിഡിൻ്റെ സൂപ്പർ പരിശീലകനായ കാർലോസ് ആഞ്ചലോട്ടിയെ ബ്രസീൽ തങ്ങളുടെ ദേശീയ ടീം പരിശീലകനായി പരിഗണിക്കുന്നുവെന്ന വാർത്ത ഏറെകാലമായി ഉയർന്നു കേൾക്കുന്നത്. എഡേഴ്സനടക്കം ചില ബ്രസീൽ താരങ്ങൾ തന്നെ ഇക്കാര്യം പരസ്യമായി പറഞ്ഞിരുന്നു. ബ്രസീൽ ഫുട്ബോൾ അധികൃതരും ഇത് സ്ഥിരീകരിച്ചിരുന്നു. എന്നാൽ ഈ വാർത്തകളോടെന്നും തന്നെ ഇതുവരെ പ്രതികരിക്കാൻ റയൽ പരിശീലകൻ തയ്യാറായിരുന്നില്ല.

എന്നാൽ ഇന്നലെ റയൽ മാഡ്രിഡിൻ്റെ മത്സരത്തിന് മുന്നോടിയായുള്ള പത്രസമ്മേളനത്തിൽ ഈ അഭ്യൂഹങ്ങളെ പറ്റി ആഞ്ചലോട്ടി പ്രതികരിച്ചു. ബ്രസീൽ ടീമിന് എന്നെ വേണം എന്നതിൽ ഞാൻ സന്തോഷിക്കുന്നു. ഞാനതിൽ വലിയ ആവേശഭരിതനാണ്. പക്ഷേ നിലവിൽ എനിക്ക് റയലുമായി കരാറുണ്ട്. ആ കരാറിനെ ഞാൻ ബഹുമാനിക്കേണ്ടതുണ്ട്. റയൽ തനിക്ക് പ്രിയപ്പെട്ട ടീമാണെന്നും അതിനാൽ തന്നെ കരാർ പൂർത്തീകരിക്കാനാണ് ഇപ്പോൾ ആഗ്രഹിക്കുന്നതെന്നും ആഞ്ചലോട്ടി കൂട്ടിചേർത്തു.