ബ്ലാസ്റ്റേഴ്സിന് വേണ്ടാത്ത ഹ്യൂമേട്ടനെ പൂനെ സ്വന്തമാക്കി; അഹങ്കാരത്തിന് കിട്ടിയ തിരിച്ചടിയെന്ന് ആരാധകർ

ഹ്യൂമിനെ സ്വന്തമാക്കി പൂനെ

മഞ്ഞപ്പടയുടെ ആരാധകര്‍ ഹൂമേട്ടന്‍ എന്ന് സ്‌നേഹത്തോടെ വിളിക്കുന്ന കാനഡ താരം ഇയാന്‍ ഹ്യൂം പൂനെ സിറ്റി എഫ്‌സിയുമായി കരാറിലെത്തി. ബ്ലാസ്റ്റേഴ്‌സില്‍ കളിക്കാന്‍ താല്‍പ്പര്യമുണ്ടെന്ന് ഹ്യൂ അറിയിച്ചിരുന്നെങ്കിലും ഹ്യൂമിനെ വേണ്ടെന്ന നിലപാടായിരുന്നു ബ്ലാസ്റ്റേഴ്‌സ് മാനേജ്‌മെന്റ് സ്വീകരിച്ചത്. 

ബ്ലാസ്റ്റേഴ്സ് ഒഴിവാക്കിയതോടെ താരവുമായി പൂനെ കരാറിലെത്തുകയായിരുന്നു. പൂ സിറ്റി തങ്ങളുടെ ഔദ്യോഗിക ട്വിറ്റര്‍ വഴിയാണ് ഇന്ത്യന്‍ സൂപ്പര്‍ ലീഗില്‍ ഏറ്റവും കൂടുതല്‍ ഗോള്‍ നേടിയ താരത്തെ ടീമിലെത്തിയ വിവരം പുറത്തുവിട്ടത്. 

കഴിഞ്ഞ സീസണില്‍ ഹാട്രിക്കടക്കം നേടി കേരള ബ്ലാസ്റ്റേഴ്‌സ് നിരയില്‍ ഏറ്റവും കയ്യടി നേടിയ താരമാണ് ഇയാന്‍ ഹ്യൂം. പരിക്കേറ്റതിനെ തുടര്‍ന്ന് അവസാന മത്സരങ്ങളില്‍ പുറത്തിരിക്കേണ്ടി വന്നത് താരത്തിന് വിനയായി. സൂപ്പര്‍ ലീഗ് മത്സരങ്ങള്‍ക്ക് ശേഷം നാട്ടിലേക്ക് തിരിച്ച ഹ്യൂം അഞ്ചാം സീസണില്‍ താനുണ്ടാകില്ലെന്ന് സ്ഥിരീകരിച്ച് രംഗത്ത് വരികയായിരുന്നു. 

ബ്ലാസ്റ്റേഴ്സില്‍ കളിക്കാന്‍ ആഗ്രഹിച്ചിരുന്നെങ്കിലും മാനേജ്മെന്റ് ഇക്കാര്യത്തില്‍ വ്യത്യസ്ത തീരുമാനമെടുക്കുകയായിരുന്നുവെന്നാണ് തന്റെ സോഷ്യല്‍ മീഡിയ അക്കൗണ്ട് വഴി ഹ്യൂം അറിയിച്ചത്. ആരൊക്കെ പോയാലും ഹ്യൂമേട്ടൻ ബ്ലാസ്റ്റേഴ്സിനെ വിട്ട് പോകില്ലെന്ന അഹങ്കാരത്തിന് കിട്ടിയ തിരിച്ചടിയാണിതെന്ന് മഞ്ഞപ്പടയുടെ ആരാധകർ പറയുന്നു.