മോഡ്രിച്ചിനെ സ്വന്തമാക്കണമെങ്കില്‍ എത്ര മുടക്കണം ?; ക്രൊയേഷ്യന്‍ താരത്തിന് റയലിട്ട വിലയില്‍ ഞെട്ടി ഫുട്‌ബോള്‍ ലോകം

റഷ്യൻ ലോകകപ്പിൽ ക്രൊയേഷ്യയെ ഫൈനലിൽ എത്തിച്ച ലൂകാ മോഡ്രിച്ച് ക്ലബ്ബ് വിടുമെന്ന റിപ്പോര്‍ട്ടുകളെ തകര്‍ക്കുന്ന പ്രസ്‌താവനയുമായി റയൽ മാഡ്രിഡ് പ്രസിഡന്റ് ഫ്ളോറന്റിനോ പെരസ് രംഗത്ത്.

റയലിന്റെ മധ്യനിരയിലെ ശക്തനായ മോഡ്രിച്ചിനെ സ്വന്തമാക്കാന്‍ ആഗ്രഹിക്കുന്നവര്‍ 750 ദശലക്ഷം യൂറോ ഇറക്കേണ്ടിവരുമെന്നാണ് പെരസ് വ്യക്തമാക്കിയിരിക്കുന്നത്.

ഇറ്റാലിയൻ ക്ലബായ ഇന്റർ മിലാനിലേക്ക് മോഡ്രിച്ച് പോകുമെന്ന റിപ്പോര്‍ട്ടുകള്‍ നിലനില്‍ക്കെയാണ് പെരസ് അതിശയിപ്പിക്കുന്ന മറുപടി നല്‍കിയത്.

ബാഴ്‌സലോണയില്‍ നിന്നും പിഎസ്ജിയിലേക്ക് ചേക്കേറിയ ബ്രസീല്‍ താരം നെയ്‌മറുടെ അഞ്ചിരട്ടി വിലയാണ് മോഡ്രിച്ചിന് പെരസ് ഇട്ടിരിക്കുന്നതെന്നതാണ് എല്ലാവരെയും അത്ഭുതപ്പെടുത്തുന്ന പ്രത്യേകത.

റഷ്യൻ ലോകകപ്പിലെ മിന്നും താരമായ മോഡ്രിച്ച് ഫുട്‌ബോള്‍ ലോകത്തെ മധ്യനിരയിലെ ഏറ്റവും കരുത്തനായ താരമാണ്. ക്രിസ്‌റ്റ്യാനോ റൊണാള്‍ഡോ യുവന്റസിലേക്ക് പോയതോടെ ക്രൊയേഷ്യന്‍ താരം ക്ലബ്ബ് വിടുമെന്ന വാര്‍ത്തകള്‍ സജീവമായി നിലനില്‍ക്കുമ്പോഴാണ് പെരസ് നിലപാടറിയിച്ചത്.

പ്രായം 32ആയെങ്കിലും മോഡ്രിച്ചിനെ ഉപേക്ഷിക്കാന്‍ താല്‍പ്പര്യമില്ലെന്നാണ് റയല്‍ വ്യക്തമാക്കുന്നത്.